Меню
6+

Сетевое издание «Кюре»

14.02.2022 09:12 Понедельник
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Оперштабдин нубатдин заседанидал

Гьар гьафтеда коронавирусдихъ галаз женг тухун патал Сулейман-Стальский районда кардик квай Оперативный штабдин заседание муниципалитетдин Кьил Нариман Абдулмуталибован регьбервилик кваз 7-февралдиз кьиле фена.

Райондин территориядал алай эпидемиологиядин гьаларикай райондин центральный больницадин кьилин духтур Жафер Къурбанисмаилова гегьенш рахунар авуна. Ада къейд авурвал, коронавирусдик начагъбурун кьадар алатай гьафтедив гекъигайла районда 5 сеферда гзаф хьанва. Гьа са вахтунда, абурун арада лап чIуру гьалда начагъбур авач. Алай вахтунда ЦРБ-дин инфекцийрин отделенида начагъ I8 кас ава, абурукай 5 касдик ковид азар квайди тестикь хьанва. Начагъ хьайи яш тамам тахьанвай кьве кас (абурукай сад бицIи аял я) республикадин клиникадин махсус отделенидиз ракъурнава. Амбулаториядин начагъбурун кьадарни гзаф хьанва. Алай вахтунда медработникрин гуьзчивилик кIвалера 689 кас (са гьафтеда абурун кьадар 4299-дан артух хьана) ква, абурукай 1440 кас ковиддик, 34 кас стIалжемдик начагъ я, 515 кас коронавирусдик начагъбурухъ галаз алакъада хьана. Амбулаториядин къайдада начагъ 120 касди пулсуз герек дарманар къачузва.

Жафер Къурбанисмаилова азардин аксина рапар ягъунин кIвалах кьиле физвай гьалдикайни малумат гана. Ада лагьайвал, районда икьван чIавалди 17525 касди рапар янава, ида рапар ягъун лазим тир агьалийрин 6I процент тешкилзава. Вакцина тахьун себеб яз алатай гьафтеда рапар ягъунин кIвалах акъваз хьанвай. Алатай жуьмя юкъуз райондин больницади «КовиВак» ва «ЭпиВак Корона» вакцинайрин 600 раб (доза), гьакIни «Гам-Ковид-Вак М» вакцинадин 70 раб (доза) къачуна. ЧIехи яшарин инсанрин арада рапар ягъунин кIвалах давам жезва, аялрин патай рапар ягъуниз ашкъи авайбур авач.

Райондин образованидин идарайра эпидемиологиядин жигьетдай арадал атанвай гьаларикай образованидин управленидин начальникдин заместитель Къачабег Аминова малумат гана. Ада лагьайвал, алай вахтунда арада алакъа аваз кIелунин къайдадал (дистанционное обучение) кьве школа: Кьасумхуьруьн 1-нумрадин ва ЦIийи поселокдин юкьван школаяр элячIнава. Райондин образованидин идарайра эпидемиологиядин жигьетдай авай гьалар, начагъ аялрин ва муаллимрин кьадар гьикьван ятIа РУО-дин руководстводин гуьзчивилик ква.

Районда коронавирусдихъ галаз женг тухун патал кардик квай Оперштабдин виликан заседанийрин протоколрин ва ДР-дин санитарный кьилин духтурдин тапшуругъар кьилиз акъудзавай гьалдикай, Роспотребнадзордин истемишунар кьилиз акъудун лазим тирдакай, бюджетдин хилен работникрин ПЦР-тестированидин нетижайрикай хатасузвал хуьнин рекьяй райадминистрациядин Кьилин заместитель Абуталиб Фатулаева малумат гана.

Заседанидин нетижаяр райондин Кьил Нариман Абдулмуталибова кьуна.

- Пандемия пайда хьайи кьве йисан къене и азардик аялар начагъ хьайи дуьшуьшар чаз хьайиди туш, — лагьана Нариман Абдулмуталибова. – Идалайни гъейри, аялар эпидемиядивай къеце хьайиди я. Аялар начагъ хьуни чак секинсузвал, къалабулух кутун лазим я. Са рахунни алачиз, им къалабулух кутадай кар я. ЦIийи штаммдини инсанриз зарар гзаф гузва. И чIуру гьаларин, коронавирус чукIунин вилик пад кьун патал гьар са касди азардин аксина рапар ягъун чарасуз я. Рапар ягъуни азар акатай кас фад ва са четинвални авачиз сагъ хъухьуниз куьмек гузвайди, гьакIни рапар ягъай кас лап кьериз начагъ жезвайди ашкара я. Гьавиляй, гьуьрметлу районэгьлияр, ша чна вирида саналди коронавирусдин аксина женг чIугван ва рапар ягъин!

Заседанидал районда эпидемиядин гьалариз талукь маса месэлайризни килигна.

Асият Мирзалиева,

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4