Район туризмдин майдандиз элкъуьрда

Сулейман-Стальский район вичел фикир желбдайди хьуниз ва ана туризм вилик тухунин мумкинвилериз къимет гунин мураддалди муниципалитетдиз Дагъустандин 18 туроператоррин векилар ва и хилен пешекарар атана. Абурун арада Центральный Россиядай тир векиларни авай.

Районда кардик квай спортдин, туризмдин ва жегьилрин крарин Комитетдихъ, Жегьилрин парламентдихъ галаз мугьманриз тамашуниз лайих тир машгьур чкайриз ва са бязи туриствилин объектрал экскурсия тешкилна. Кьилди къачуртIа, турэкспертар Агъа-СтIалдал СтIал Сулейманан КIвал-музейдиз, Алкьвадрин хуьре Гьасан-эфендидин музейдиз, «Кпул ятар» санаторийдиз, Кьасумхуьрел куьгьне 17 тагъунин муькъуьз, Кьулан СтIалдал «Асланан вир» ял ядай зулуниз, НуьцIуьгърин хуьруьн тамашуниз лайих тир чкайриз (ХVII асирдин къаравулвал чIугвадай минара, дагьар, куьгьне мискIин ва 360 йисалай виниз яш авай чинар тар), Векьелрин хуьре глэмпингдиз, Кьасумхуьрел Испикрин куьгьне технологиядай хъенчIин къапар гьазурзавай Набиюллагь Керимханован устIарханадиз тамашна. Культурадин идарайрин ва Жегьилрин парламентдин векилри мугьманар гьар са объектдин тарихдихъ ва кьетIенвилерихъ галаз танишарна, вичиз хас тир лишанрин чкайрикай, рекреациядин объектрикай, гьакIни милли ментолитетдикай, лезгийрин куьгьне хуьрекар, тIямлу шейэр, хъвадай затIар гьазурунин къайдайрикай, халкьдин художественный сеняткарвилерикай суьгьбетар авуна.

Турэкспертри Сулейман-Стальский районда туризм вилик тухун патал тамашуниз лайих тир чкайрин мумкинвилериз къимет гана, чеб фейи туриствилин объектрикай фикирар лагьана, гьа объектар Дагъустандин туриствилин кластердик кутунин патахъай анриз хъсан къимет гана. Абуру къейд авурвал, муниципалитетдихъ туриствилинни рекреационный ва экотуризм, агротуризм, къенепатан туризм вилик тухудай мумкинвилер, гьакIни районда туриствилин информациядин центр тешкилунин чарасузвал ава.

Къейд авун лазим я хьи, Сулейман-Стальский районди туристрин фикир гьеле вичел желбнава. Районда конкуренция арадал гъиз жедай туриствилин инфраструктура ва турпродукт арадал гъунин мумкинвилериз са вацран вилик муниципалитетдин администрацияда туриствилин хилен, талукь тир министерствойрин ва ведомствойрин векилрин иштираквал аваз тухвай стратегиядин сессиядални килигнай. Райондин руководстводи туриствилин виликамаз тайин авунвай рекьерин планар, талукь инфраструктура арадал гъунин ва вилик тухунин проектар хъсандиз чирна туькIуьрзава. Районда гележегда туризм вилик тухун ATLAS компанияди Мергьеметлувилин «Умуд» фондуни заказ гана ва Сулейман-Стальский райондин администрациядин ккуьмекни галаз туькIуьрзавай муниципалитетдин сад-садан патав гвай 5 хуьре (Кьасумхуьр, Агъа-СтIал, Кьулан-СтIал, Вини-СтIал ва Курхуьр) агломерация вилик тухунин Мастер-пландани къалурнава. Проект туькIуьрзавайбуру туриствилин хел патал итижлу ва мумкин тир инвестиционный майданар къалурнава, гьатта туризм вилик тухунин кар алай кьве рехъни къейд авунва: гзаф везифайрин культурадинни марифатдин центрани галай Кьиблепатан Дагъустандин тарихдинни культурадин музей ва хизанри санал ял ягъун патал Кьасумхуьруьн кьве муькъуьн арада Набережная зона (зул) дуьзмишун.

Райондин руководство ва туризмдин хилен пешекарар кIевелай инанмиш тирвал, гуьзел тIебиат, тарихдин пак чкаяр, культурадинни архитектурадин имаратар авай, гьар са рекьяй йигиндаказ виликди физвай, мугьманперес инсанар яшамиш жезвай Сулейман-Стальский район мукьвал тир гележегда туризмдин майдандиз элкъведа.

Хазран Кьасумов