Аскерриз-интернационалистриз бахшнавай мярекат

Алай йисан 15-февралдиз Кьасумхуьрел, аскеррин-интернационалистрин аллеяда Афгъанистандай советрин кьушунар ахкъудайдалай инихъ 33 йис тамам хьуниз талукьарнавай мярекат кьиле фена. Ам Сулейман-Стальский райондин Кьил Нариман Абдулмуталибова, адан заместителри, райадминистрациядин жавабдар къуллугъэгьлийри, «Российский Союз ветеранов Афгъанистана» умуми Россиядин общественный организациядин райондин отделенидин председатель Ислеман Ризаева, общественный тешкилатрин, Жегьилрин парламентдин, ЦIийи поселокдин юкьван школадин юнармейцийрин отряддин векилри аскеррин-интернационалистрин памятникдал цуьквер эцигунилай башламиш хьана.

Афгъанистандин дяведин иштиракчийриз гьуьрмет авунин лишан яз Россиядин Федерациядин Гимн яна.

Са декьикьада кисна акъвазуналди, мярекатдин иштиракчийри Афгъанистадин дяведа телеф хьайи кьегьалар рикIел хкана.

Райондин Кьил Нариман Абдулмуталибова вичин рахунра Афгъанистанда кьиле фейи дяведин гьерекатар, чи уьлкведин аскерри-интернационалистри чпин ватанпересвилин буржи намуслудаказ кьилиз акъудайди рикIел хкана.

- Къе чна Ватандилай къеце чпин ватанпересвилин буржи кьилиз акъудайбурун югъ къейд ийизва, — лагьана Нариман Абдулмуталибова. – Тамам 33 йисан вилик советрин кьушунар Афгъанистандин чилелай хтана. Ана 10 йисуз кьиле фейи женгера агъзурралди чи аскерри ва офицерри чпин чанар гана, диде-бубайрин, мукьва-кьилийрин рикIера сагъ тежер хер туна. Афгъанистандин дяведа чи райондайни 136 касди иштирака, абурукай 5 кас — Абдул Саидов, Гуьлмегьамед Къурбанов, Раидин Османов, Алискер Пулатов яргъал уьлкведа игитвилелди телеф хьана. Чна къе абур рикIел хкизва, абурун багърийриз, хизанриз башсагълугъвал гузва. Къенин юкъуз чна гьакIни Венгрияда, Чехословакияда ва Чечняда кьиле фейи женгерин иштиракчиярни рикIел хкизва. Абуруни Ватандин вилик чпин буржи намуслувилелди кьилиз акъудна.

Митингдал Афгъанистандин ветеранри Союздин райондин отделенидин председатель Ислеман Ризаев рахана. Ада «Афганистан – наша память и боль» ктаб акъудунай райондин руководстводиз ва мергьеметлувилин «Умуд» фондуниз чухсагъул лагьана. И ктаб акъудуник пай кутур Вини СтIалрин юкьван школадин муаллим Жамиля Багъишевадив, Афгъанистандин женгерин иштиракчи Жарулла Загьировав ва «Куьредин хабарар» газетдин дизайнер-верстальшик Шагь Шабановав Чухсагъулдин чарар вахкана.

Ислеман Ризаева гьакIни аскеррив-интернационалистрив рикIел аламукьдай медалар ва «Афганистан – наша память и боль» ктабарни вахкана.

***

Ватандилай къеце чпин ватанпересвилин буржи кьилиз акъудайбурун йикъаз талукьарнавай мярекатар школайра, аялрин бахчайра ва культурадин маканрани кьиле фена.

Хазран Кьасумов