Физикадай олимпиада кьиле тухвана

13-февралдиз чи райондин ЦIийи поселокдин юкьван школада анин выпускник, Россиядин физикадинни математикадин илимрин виридалайни жегьил доктор Заур Алисултанован гьуьрметдай чIехи классрин аялрин арада физикадай олимпиада кьиле тухвана.

Ам шад гьалара ачухунин мярекатда райондин Кьил Нариман Абдулмуталибова, Дагъустандин илимрин центрадин сотрудник Заур Алисултанова ва мергьеметлувилин «Иман» фондунин векил, райондин Собранидин депутат Мурад Ханбалаева иштиракна. Абуру олимпиададин иштиракчийриз хуш келимаяр лагьана, меслятар къалурна. Яшарин кьве категориядай кьиле фейи олимпиадада 42 аялди иштиракна. Абурун арада Сулейман-Стальский, Ахцегь, Кьурагь, Мегьарамдхуьруьн ва Хив районрин умуми образованидин идарайрин 10-11-классра кIелзавай аялар авай.

Тешкиллувилин комитетдик ва экспертно-методический комиссиядик ДГУ-дин преподавателар, Дагъустандин илимдин центрадин старший научный сотрудник, ДГУ-дин физикадинни математикадин илимрин доктор Заур Алисултанов, кIелунин рекьяй ДГУ-дин физический факультетдин декандин заместитель, алакьунар авай аялрин Центрадин директор, физикадинни математикадин илимрин кандидат Гьажимирзе Рагьимханов ва РАН-дин физикадин институтдин ведущий научный сотрудник, физикадинни математикадин илимрин кандидат Адлер Гьамзатов квай.

Олимпиададин иштиракчийрив умуми образованидин асул программайрихъ галаз кьадайвал Заур Алисултанова гьазурнавай тапшуругъар вугана.

Ругуд тапшуругъ квай (аялрин гьар са категория патал) олимпиададин вахт 3 сят яз тайинарнавай. Адан вахт куьтягь хьайила, эхирдай «Иман» фондуни гьа аялдиз нисинин тIуьн гун тешкилна.

Олимпиададин нетижаяр кьадай вахтунда РАН-дин физикадин институтдин илимдин сотрудник Адлер Гьамзатова школьникриз «Поезда будущего на основе высокотемпературных сверхпроводников» темадай эксперимент къалурна.

Олимпиададин нетижаяр оргкомитетдин ва экспертдин комиссиядин председатель Заур Алисултанова кьуна. Ада къейд авурвал, талукь тирвал олимпиадада ЦIийи поселокдин СОШ-дин 10-классдин ученик Шамиль Тагьиров ва 11-классдин ученица Эльвира Къафарова гъалиб хьана. 10-классдин аялрин арада приздин 2 ва 3-чкаяр гуниз талукь тирвал, Агъа-СтIал Къазмайрин СОШ-дин ученица Гьуьруьпери Гьажиева ва Кьурагь райондин КIирийрин хуьруьн СОШ-дин

ученик Рамазан Тагьирбегов, 11-классдин аялрин арадани Вини-СтIалрин СОШ-дин ученица Зилефат Мегьамедова ва ЦIийи поселокдин СОШ-дин ученица Алина Асретова лайихлу хьана.

Гуьгъуьнлай райондин Кьил Нариман Абдулмуталибова, физикадинни математикадин илимрин доктор Заур Алисултанова, РУО-дин начальник Гьуьсейн Шихбабаева ва масабуру гъалибчийрив ва призеррив наградаяр шад гьалара вахкана.

Гъалибчийриз ва призерриз грамотаяр, пишкешар ва гьакIни мергьеметлувилин «Иман» фондунин патай пулдин премияр гана. ИкI, 10-классдин аялрин арада гъалибчидиз – 20 агъзур, 11-классдин аялрин арада гъалибчидиз – 25 агъзур манат пулдин премияр гана.

ЦIуд лагьай классдин аялриз-призерриз, талукь тирвал, 15 ва 10 агъзур, 11-классдин аялриз-призерриз 20 ва 15 агъзур манат пулдин премияр гана.

Талукь тир къайдада пулдин премияр гьакIни аялар аниз гьазурай муаллимар тир Сабир Мейлановаз (ЦIийи поселокдин СОШ), Гаяна Яралиевадиз (Вини-СтIалрин СОШ), Даир Бабаеваз (Агъа-СтIал Къазмайрин СОШ) ва Абдулнасир Тагьирбеговазни (Кьурагь райондин КIирийрин хуьруьн СОШ) гана.

Анал тIварцIихъ галай олимпиададин вири иштиракчийризни рикIел аламукьдай пишкешар гана.

Абидин Камилов