Меню
6+

Сетевое издание «Кюре»

28.02.2022 10:28 Понедельник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Халкьдихъ галаз санал

1931-йисуз районэгьлийрин руьгьдин игьтияжар таъминарунихъ элкъуьрнавай сифтегьан газет «Колхоздин пайдах» чапдай акъатна. Гьар са районэгьлидиз багъри, хушвилелди гьуьрметзавай райондин газет акъатиз башламишайдалай инихъ 2021-йисуз 90 йис тамам хьана. Вичиз са шумуд тIвар кьисмет хьайи газетди сифте «Колхоздин пайдах», гуьгъуьнилай «Коммунизмдин гатфар», «Халкьдин гаф» ва алай вахтундани «Куьредин хабарар» тIварар алаз и девирда халкьдиз паквилелди къуллугъзава. Сифтегьан нумрадилай башламишна яргъал вахтунда — 1938-йисалди газет латиндин гьарфарал чап ийиз хьана.

Газетди вич акъатиз башламишай 1931-йисалай уьмуьрда жезвай виридалайни важиблу вакъиайриз кьетIен фикир гуз хьана. Газетдин тарихдиз вил вегьейла, подшивкаяр гъилелай авурла аквазва хьи, райондин экономика, культура, образование вилик тухунин, несилриз ахлакьдин, марифатдин, зегьметдин, ватанпересвилин тербия гунин, милли чIал, адетар, халкьдин арада авай дуствал хуьнин, мягькемарунин кардик газетдин коллективди еке пай кутуна ва и важиблу кар гилани давамарзава.

Алатай йисар редакциядин коллектив патал гзаф бегьерлубур хьана. Гьакъисагъвилелди зегьмет чIугур редакторрин ва амай къуллугъчийрин алахъунар себеб яз, алай вахтуни истемишзавай шартIариз жаваб гузвай, важиблу месэлаяр гьялиз алакьзавай, яратмишдай коллектив арадал атана.

Газетдихъ 90 йисан рекье агалкьунар гзаф хьана. Газетдин коллективдиз 4 сеферда Госкомиздатдин ва культурадин работникрин профсоюздин обкомдин гъиляй-гъилиз къведай яру пайдах, Дагъустан Республикадин печатдин ва информациядин министерстводин, «Сулейман-Стальский район» муниципальный райондин администрациядин Гьуьрметдин грамотаяр гуни идан гьакъиндай ачухдиз шагьидвал ийизва.

Виридан алахъунар себеб яз кIелзавайбурухъ, мухбиррихъ галаз сих алакъаяр мягькемарна, газетдин чинрал халкьдик секинсузвал кутазвай темаяр гъана, зегьметчи инсанрин тарифлу тежриба гегьеншариз куьмек гана, яшайишдин шартIар вилик тухунин кардик газетди алакьдай пай кутуна.

Алай вахтундани газетдин редакциядин вилик акъвазнавай везифаяр важиб лубур я.

Вахтуни, цIийи демократияди арадал гъанвай шартIара, халкьдин яшайиш туькIуьрун, адак ватанпересвилин руьгь кутун, райондин уьмуьр вири хилерай вилик тухун, уьлкведа, республикада, районда жезвай цIийивилер, дегишвилер районэгьлийрив агакьарун газетдин кьилин везифа я.

Тарихдикай рахадайла, 90 йис тарихдин уьлчмейралди гьисабайтIа, газет патал са акьван еке вахт туш. Амма ада халкьдин руьгьдиз къуллугъ авунин дережа фикирдиз гъайитIа, ам гзаф чIехи я. Вири и йисара райондин газет халкьдихъ галаз къуьн-къуьневаз фена, адакай халисан ихтибарлу даях, куьмекчи хьана.

И девирда райондин газетда хъсан, вини дережадин къилихрин ва бажарагъдин хейлин журналистри, редакторри кIвалахна.

Къе абур рикIел хкун чаз кутугнава. Абурун жергедай яз редакциядин кьиле акъвазай ва гьакъисагъвилелди зегьмет чIугур ялавлу журналистар, редакторар хьайи Мемей Эфендиеван, Паша Исаеван, Мегьамеднаби Набиеван, Гьажи Аликберован, МутIагьир Рзаханован, Сейфула Гьабибован, Къурбан Мамедован, Мамед Гьажиагъаеван, Жалал Алахвердиеван, Загьидин Къазанбегован, Сейфудин Муталибован, Анварбег Миметован газет тешкил хьайи сифте йикъарилай башламишна саки 47 йисуз наборщикдин учениквилелай башламишна газетдин редакторвилел кьван зегьмет чIугур ва редакторвиле 27 йисуз гьакъисагъвилелди кIвалах авур Сайид Алиметован, редактордин заместителар хьайи Играмудин Ханбалаеван, Дадаш Дадашеван, Тариверди Мусаеван, Къирим Мурадханован, жавабдар секретарар яз хьайи Алибег Алибегован, Шагьабудин Шихбабаеван, Осман Османован, отделдин заведующияр хьайи Абдусемед Гьабибулаеван, Мегьамедгьади Садыкован, корреспондентар яз хьайи Бидирхан Мегьамедрагьимован, Яхьия Мегьамедкьасумован, Агъасеркер Къадимован тIварар еке гьуьрметдивди кьаз кIанзава. Гзаф йисара типографияда кIвалахай Абдулмежид Гьасанован, Жабир Ханмегьамедован, Кичибег Ханбабаеван, Играмудин Улугъаеван, Зейдулагь Абдулазизован, Мегьамед Муртузалиеван, Селимат Абдулкеримовадин, Тамум Агьмедхановадин, Перихалум Шихахмедовадин ва масабурун тIварарни чаз еке гьуьрметдивди кьаз кIанзава.

Гьайиф хьи, и юлдашар чи арада амач, абуруз регьмет хьурай.

Газетди бажарагълу журналистрин тамам несил тербияламишна. Адан чинра са жерге жегьил шаиррини прозаикри чпин къелем ахтармишна ва абур газет себеб яз яратмишунрин шегьредал экъечIна. Республикада тIвар-ван авай писателар,

шаирар тир Абдулбари Магьмудова, Ибрагьим Гьуьсейнова, Сажидин Саидгьасанова, Пакизат Фатулаевади, Нажмудин Шихнабиева ва масабуру чпин сифте камар райондин газетдилай башламишна.

Халкьдин арада хци, камаллу, таъсирлу гафуналди еке гьуьрмет къазанмишай, редакцияда хейлин йисара кIвалахай, чпихъ еке тежриба авай, чахъ галаз къени сих алакъаяр хуьзвай редактор хьайи Мирземет Наджафован, жавабдар секретарь хьайи Али Алиеван, Сажидин Саидгьасанован, Нажмудин Шихнабиеван, Вадим Жамалдинован тIварарни чIехи гьуьрметдивди кьун кутугнава. Абуруз баркалла.

Райондин газетда яргъал йисара гьакъисагъвилелди зегьмет чIугур Наташа ва Зильфира Агьмедхановайрикай, Мингьажудин Кьасумовакай гзаф разивилин гафар лугьуз кIанзава.

Чи гьар са нумра безетмишун, «Куьредин хабарар» халкьдин-районэгьлийрин рикI алай газетдиз элкъуьрун патал чаз гьамиша чпелай алакьдай куьмекар гузвай амадагриз, гьакI чкайрилай чав яргъал йисара метлеблу макъалаяр агакьарзавай чи баркаллу мухбирриз рикIин сидкьидай пара сагърай лугьуз кIанзава.

Абурун жергедик райондин образованидин управленидин начальник Гьуьсейн Шихбабаев, райондин культурадин управленидин начальник Майрудин Бабаханов, райондин центральный больницадин кьилин духтур Жафер Къурбанисмаилов, «Куьредин ярар» Культурадин центрадин комитетдин председатель Агьмедпаша Агьмедпашаев, Шагьабудин Шабатов, Сажидин Саидгьасанов, Рейсудин Набиев, Замир Мегьамедов, Зейнулагь Наврузов, Эйзудин Сайдумов ва гзаф масабур акатзава.

Лугьун лазим я, редакция алай вахтунда хъсан тежриба авай, кар алакьдай, чпин пешедал рикI алай работникралди таъмин я. Абурукай 2 кас Дагъустандин Республикадин культурадин лайихлу работникар, 3 касни Россиядин журналистрин Союздин членар я.

Газетдин отделрин заведующияр — Абидин Камилован, Хазран Кьасумован, корректор-стилист Суьлгьуьжат Баламетовадин, компьютердин пешекар Шагь Шабанован, сайтдин корреспондентар — Зарият Агъарагьимовадин, Лена Саидовадин зегьмет тариф авуниз лайихлу я.

Къейд авун лазим я, гьялиз тахьанвай месэлаярни тIимил амач. Газетдиз гузвай бязи макъалайри гьелелиг кIелзавайдан руьгь бес кьадарда тухарзавач. Критикадин, диндин, экстремизмдин, терроризмдин месэлайриз талукьарнавай материалар тIимил жезва. Майишатрин, карханайрин кIвалахдиз дериндай анализ гузвай материаларни артухарна кIанда,

Идарайрин регьберар, пешекарар газетдин чинрай тIимил рахазва. Жегьил журналистрин жергеярни гегьеншарун лазим къвезва.

Гьуьрметлу районэгьлияр! «Куьредин хабарар» газет тешкилун ва 90 йисуз ам чап авун им шаксуз чи халкь руьгьдин, культурадин жигьетдай хкажунин тарихдин метлеб авай вакъиа я.

Заз дамахдивди къейд ийиз кIанзава хьи, муниципальный райондин Кьил Нариман Шамсудинович Абдулмуталибова газетдиз гузвай куьмек, дикъет екеди я.

И кар себеб яз редакцияда журналистриз ва амай работникриз кIвалахдай вири жуьредин къулай шартIар яратмишнава. Редакция герек вири шейэралди таъмин я, адан материально-технический база къвердавай хъсан жезва. Редакциядин дараматни капитальнидаказ ремонтнава, анра экуь ва михьи я.

Редакциядин коллективдин зегьмет себеб яз эхиримжи йисара газетдин метлеблувал, умуми акунар, шрифт, шикилрин ери, газет вич туькIуьр хьанвай тегьер хъсан патахъ дегиш хьанва. Гележегдани журналиствилин кеспидин лап хъсан адетар артмишуналди редакциядин работникри кIелдайбурун вилик газетдин гьуьндуьрвал хкажун патал чпелай аслу вири крар ийида, гележегдани, «Куьредин хабарар» куь дуст, сирдаш ва меслятчи яз амукьун патал зегьмет чIугвада.

За газетдин коллективдиз, анин ветеранриз, вири районэгьлийриз «Куьредин хабарар» газетдин 90 йис тамам хьунин сувар рикIин сидкьидай мубаракзава. Чна гележегдани райондин газет генани чи гьар йикъан уях хабардардиз, камаллу суьгьбетчидиз, халкь гьавурдик кутадай, тупламишдай, хъсан крарал руьгьламишдай умудлу, гужлу таъсирлу такьатдиз элкъуьрун патал зегьмет чIугвада.

Асият Мирзалиева, «Куьредин хабарар» газетдин кьилин редактор

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

11