«Дагъустандин булахар» выставкада

Дагъустан Республикадин художникрин Союздин выставкайрин залда «Дагъустандин булахар» («Родники Дагестана») тIвар алаз декоративно-прикладной ва изобразительный искусстводин республикадин выставка ачухуниз талукьарнавай мярекат кьиле фена. Ам Россиядин халкьарин культурадин ирсинин йисаз ва республикадин халкьдин яратмишунрин КIвалин 85 йис тамам хьуниз талукьарнавайди тир.

Мярекат ДР-дин культурадин министерстводи ва республикадин халкьдин яратмишунрин КIвалин Дагъустандин художникрин Союздин куьмекни галаз тешкилнавайди тир.

Выставкада республикадин жуьреба-жуьре пипIерай халкьдин сеняткарвилерин устадри гъанвай шейэр, гьакIни декоративно-прикладной ва изобразительный искусстводин рекьерай мастер-классар къалурна.

Сулейман-Стальский райондин патай выставкада райондин краеведческий музейдин директор, художник – хъенчIин къапарин устIар Набиюллагь Керимханова векилвална.

Художественный яратмишунар ва декоративно-прикладной искусство вилик тухуник пай кутунай Н. Керимхановаз ДР-дин культурадин министерстводин диплом гана.

Лагьана кIанда, Набиюллагь Керимханова «Дагъустандин булахар» выставкада, халкьдин сеняткарвилерин фестивалра гьар йисуз иштиракзава, анра ганвай наградаярни художникдихъ гзаф ава.

Художник Набиюллагь Керимхановаз ДР-дин туризмдин ва халкьдин сеняткарвилерин министерстводи чухсагъул малумарна.

Къейд авун лазим я хьи, Набиюллагь Керимханова эхиримжи 5-6 йисан къене республикада ва Россиядин маса субъектра тухвай, гьакIни международный халкьдин сеняткарвилерин конкурсрани фестивалра иштиракна, дипломар къачуна.

Хазран Кьасумов