«Элкъвей столдихъ» - «Пушкинан картадикай»

Муниципальный «КТВ» телеканалдин студияда «Пушкинская карта» программа вилик ракъурунин месэлайриз талукьарна «Элкъвей стол» кьиле фена. И программади школайра кIелзавайбуруз гузвай мумкинвилерикай ва проект кьиле физвай гьалдикай образованидин управленидин патав гвай ИМЦ-дин директорин заместитель Венера Абдуселимовади, СтIал Сулейманан КIвал-музейдин къуллугъчи Фейзудин Мамедова, НуьцIуьгърин юкьван школадин директордин заместитель Руслан Шабанова, райондин Жегьилрин парламентдин председатель Фарид Девлетханова ва Кьасумхуьруьн 2-нумрадин юкьван школадин 10-классдин ученица Амина Селимовади рахунар авуна. Абуру къейд авурвал, «Пушкинская карта» программадай 2000-далай виниз аялар СтIал Сулейманан КIвал-музейдиз, 50-далай виниз школьникар Кьурагьрин тарихдинни краеведческий музейдиз фена, Чуьхверхуьруьн юкьван школада кIелзавай 18 аялди Дагъустандин Огни ва Дербент шегьерра сейр тешкилна.

Райондин умуми образованидин идарайрин руководителри кIелзавайбур республикадин культурадинни тарихдин метлеб авай чкайриз, гьабурукай яз Ахцегьрин краеведческий музейдиз ва Гунибдин тарихдин объектрал тухун пландик кутунва.

10-классдин ученицаа Амина Селимовади вич Махачкъала шегьерда «Россия – Зи тарих» тарихдин паркуниз финикай, ада вичиз авур таъсирдикай суьгьбетна.

«Элкъвей столдин» иштиракчийри ихьтин къейдерни авуна. «Пушкинская карта» — им Россиядин Президент Владимир Путина гьар йисуз ийизвай «ачух линияда» гъайи теклиф я. 1-сентябрдилай Россиядин агьалияр тир 13 миллион касди (14 йисалай 22 йисал кьван яшара авай) вичин балансда 3000 манат пул авай Пушкинский картаяр къачуна. И пул жегьилривай анжах культурадин идарайра харж ийиз жеда.

Мадни, мярекатдин иштиракчийри лагьайвал, 2022-йисалай картадиз 5000 манат пул яда. Карта Россиядин вири территориядал ишлемишиз, яни вири уьлкведа сиясат ийиз, жеда. Пешекарри «КТВ-дай» тухвай передачада жегьилриз и карта къачуз жедай мумкинвилерикайни суьгьбетна.