Гъилералди къазанмишай фу ширин жеда

Бязи инсанри гьисабзавайвал, чи хуьрера жегьилриз кIвалах авач, гьавиляй абур, хайи ерияр гадарна, Москвадиз, Санкт-Петербургдиз, Тюмендин областдиз ва масанриз физва.

Эминхуьряй тир Дагъустан Республикадин хуьруьн майишатдин лайихлу работник, тежрибалу уьзуьмчи Алимирзе Агъамирзоев ихьтин фикирдихъ галаз эсиллагь рази туш.

- Чилин къадир авай, хуьруьн чкада кIвалахиз кIандай касдиз къенин хьтин шартIар, мумкивилер са вахтундани хьайиди туш, — лугьузва А. Агъамирзоева. – Эхиримжи йисара чи райондин гзаф хуьрерин мулкарал уьзуьмлухар, багълар кухтунва, теплицайрин майишатар кардик кутунва, инвесторри малдарвилин зурба майишатар тешкилнава. Ихьтин майишатра механизаторрини рабочийри вацра 25-30 агъзур, нехирбанрини дояркайри 40-45 агъзур манат пул къачузва. Жуван кIвале, хуьре им мегер тIимил пул яни?

Алимирзе Агъамирзоев гьахъ я. Районда кардик акатнавай, инвесторри тешкилнавай майишатриз кIвалахдай рабочияр, малдарар, механизаторар, агрономар бес жезвач. Жегьилар лагьайтIа, патарал физва.

КIвалахдай касдиз чи ерияр жагъин тийидай чкаяр тирди А. Агъамирзоева вичин чешнедалди къалурзава.

Хуьруьн майишатдин техникум куьтягьай Алимирзеди саки 20 йисуз «Аламишинский» совхозда уьзуьмчивилин бригададин бригадирвиле ва совхоздин кьилин агрономвиле, 6 йисуз гзаф хилерин майишат тир «Зардиян» ООО-да агрономвиле бегьерлудаказ зегьмет чIугуна.

2018-йисуз «Зардиян» ООО-да кьилин агрономвиле кIвалахзавай А. Агъамирзоеваз, кIвалахда хьайи агалкьунриз килигна, Дагъустан Республикадин хуьруьн майишатдин лайихлу работник лагьай тIвар гана.

Эхиримжи йисара тежрибалу пешекарди вичин хайиди тир Эминхуьре арендатор-уьзуьмчи яз кIвалахзава.

- Зи кIвачихъ 8 гектар уьзуьмлухар гала, — лугьузва А. Агъа мирзоева. – Гзаф йикъара зун жуван участокда экуьнлай няналди жезва. КIвалах гьамиша авайди я. Агротехникадин гьар са серенжем галай-галайвал ва чпин вахтара тухун лазим я. Заз акI я хьи, ципицIрин тегьенг чан алай затI я, вун адахъ иесивилелди гелкъведа, ада ваз хъсан, бул бегьерни гуда. КIвалах лагьайтIа, участокда гьамиша авайди я. Агъанвай столба дуьзар хъувунни, кьатI хьанвай сим кутIун хъувунни кIвалах я.

Чаз акурвал, лайихлу уьзуьмчидин участок чешнелу гьалда ава. Уьзуьмлухра жергейрин араяр цанва, тегьенгрин пунариз пер янава. Чун фейила Алимирзе уьзуьмлухра тегьенгрин кьурай ва герек авачир хилер атIунал машгъул тир. И серенжем ада 5 гектарда кьиле тухванвай.

- Тегьенгрин кьурай ва герек авачир хилер, абуру яд къачудалди, яни мартдин варз алукьдалди атIана акьалтIарун лазим я, — лугьузва тежрибалу уьзуьмчиди. – За и йикъара жуван участокда и кIвалах акьалтIарда, ахпа уьзуьмлухра ремонтрин ва тегьенгрин хилер симерал кутIунунин кIвалахрив эгечIда.

Гьакъикъатдани, Алимирзе Агъамирзоев уьзуьмлухрихъ гелкъуьнин рекьяй устад я. Ада вичин кIвачихъ галай уьзуьмлухрин гьар са гектардай гьар йисуз 90-100 центнер ципицIар кIватI хъийизва.

- КIвалахдик квачир мишер муьрхъуь кьада, лугьузва бубайрин мисалда, — ихтилатзава А. Агъамирзоева. – КIвалахди зун жегьил хъийизва, заз шадвал гузва. Мадни, за ваз рикIел гъил эцигна лугьун, жуван гъилералди къазанмишай гьалалдин фу недайлани ширин жеда.

Ваз къуватар хьурай, халкьдин суфра берекатлу ийизвай уьзуьмчи Алимирзе!

 Хазран Кьасумов