Оргкомитетдин 2-заседание

28-январдиз Сулейман-Стальский райондин Кьил Нариман Абдулмуталибован регьбервилик кваз дидед чIалан Международный йикъаз талукьарна «Лезги чIал хуьнин, вилик тухунин ва машгьур авунин карда милли прессадин везифаяр» темадай Кьасумхуьрел районрин уртах илимдинни тежрибадин конференциядиз гьазурвилер акунин ва ам тухунин месэлайрай тешкиллувилин комитетдин 2-заседание кьиле фена. Конференциядиз талукь тир план уьмуьрдиз кечирмишуникай заседанидал райондин образованидин начальник Гьуьсейн Шихбабаев рахана, ам образованидин учрежденийра тухванвай ва тухузвай мярекатрал гегьеншдиз акъвазна.

Райондин культурадин отделдин начальник Майрудин Бабаханова лагьайвал, конференциядиз талукь тир вири мярекатар планда къалурнавайвал кьиле физва, эгер коронавирус чукIунин гьалар мадни чIурубур тахьайтIа илимдинни тежрибадин конференция тухуниз са манийвални жедач. Майрудин Бабаханова конференциядиз теклиф ийидай ксарин ва анал рахадай темайрин патахъайни райондин руководстводиз вичин фикирар лагьана, гьакIни дидед чIалан мярекатар тухвана ва конкурсра тафаватлу хьайи муаллимар ва райондин газетдин работникар ашкъиламишунин теклифар гъана.

«Куьредин хабарар» газетдин отделдин заведующий, тежрибалу журналист Хазран Кьасумова заседанидал милли чIаларал акъатзавай газетра гьа са гафар гьар жуьреда кхьинал эхир эцигунин, араб, туьрк, ва маса чIаларай атанвай гафар ишлемишун акъвазарунин, гьакIни и месэлайриз райондин уртах илимдинни тежрибадин конференциядал килигунин теклиф гъана. Теклифдин тереф райондин Кьили хвена.

Организацийрин ва къуллугърин руководителри конференция тухунин ва анал килигдай месэлайрин патахъай меслятар къалурна, теклифар гана.