Карчидихъ галаз месэлайриз килигна

Сулейман-Стальский райондин Кьил Нариман Абдулмуталибов Къазахстанда яшамиш жезвай кьегьал лезги хва Идрис Селимовахъ галаз гуьруьшмиш хьана. Гуьруьшдин вахтунда район социально-экономический рекьерай вилик тухунин, кьилди къачуртIа, Эминхуьр яшайишдин, культурадин инфраструктурадин жигьетдай вилик тухунин карда куьмек гунин месэлайриз килигна.

Райондин Кьил Нариман Абдулмуталибова карчи Идрис Селимоваз районда уьмуьрдиз кечирмишзавай кар алай инвестицийрин проектрикай ва абур вилик финикай, гьакIни яшайишдин жигьетдай вилик акъвазнавай везифайрикай суьгьбетна. Нариман Абдулмуталибова лагьайвал, районда гзаф месэлаяр кура-кура кьилиз акъудзава. Эхиримжи йисара районда хуьруьн инфраструктура виликди физва, яшайишдин ва инженерный объектар эцигзава, общественный территорияр дуьзмишзава, Госпрограммаяр ва инвестицийрин проектар уьмуьрдиз кечирмишзава. Вири и кIвалахар, Нариман Абдулмуталибова къейд авурвал, меценатрин ва инвесторрин пулунин такьатрин куьмек себеб яз кьилиз акъудиз жезва.

Карчи Идрис Селимова Сулейман-Стальский районда хъсанвилихъ кьиле физвай дегишвилерин тереф кIевелай хвена ва вич районда уьмуьрдиз кечирмишзавай проектриз, кьилди къачуртIа, хуьре Етим Эминан музей эцигуниз куьмек гуз гьазур тирди къейдна.

Гуьруьшдал Эминхуьре аялрин бахча эцигунин месэладизни килигна.

Райондин Кьил Нариман Абдулмуталибова Къазахстанда яшамиш жезвай эминхуьруьнви Идрис Селимоваз рикIел аламукьдай пишкеш яз «Край мыслителей и поэтов» энциклопедия ва чкадин устадри гьазурнавай хъенчIин къапар ва тапрак гана.