Меню
6+

Сетевое издание «Кюре»

24.03.2022 09:16 Четверг
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Аялрин рикI алай муаллим

Гьуьрметлуди хьиз, муаллимдин кIвалах четинди, гьа са вахтунда жавабдардини я. Сифтегьан классрин муаллимдин кIвалах мадни четинди я. ГьикI лагьайтIа, I-классдиз къвезвай аялдиз тамамдаказ са гьарф, рекъем чизвач. ГьакI хьайила, сифте яз школадиз къвезвай аялдиз гьарфар, рекъемар кхьиз, кIелиз чирзавайди сифтегьан классрин муаллим я. Гьавиляй школаяр акьалтIарунин мярекатрал выпускникри чпин сифтегьан муаллимрин тIварар еке гьуьрметдивди кьазва, абуруз цуьквер, пишкешар гузва.

Абдул Саидован тIварунихъ галай Эминхуьруьн юкьван школадин сифтегьан классрин муаллим Залина Жавидиновна Исмаиловадикай газетдиз макъала кхьин завай 1-классда кIелзавай аялрин диде-бубайри тIалабна. И карди зун са кIусни мягьтеларнач, гьикI лагьайтIа, ам руководитель тир классда зи гада Юсуфани кIелзава. Залина Жавидиновна вичин пешедал ва аялар рикI алай, школада гьам муаллимри, гьамни кIелзавайбуру гьуьрметзавай муаллим тирди заз хъсандиз чизвай.

З. Исмаиловади хайи хуьруьн юкьван школа, 2000-йисуз Гь. Б. Къазиагьмедован тIварунихъ галай Дербент шегьердин педагогический колледж хъсан къиметар аваз акьалтIарна. Вичин зегьметдин рехъни жегьил пешекарди гьа и йисуз хайи хуьруьн школада сифтегьан классрин муаллимвиле кIвалах авунилай башламишна. Залина Жавидиновнади вад йисуз акьалтзавай несилдиз чирвилер гана.

2005-йисуз З. Исмаилова кьадар-кьисметди вичиз Кеферпатан меркез лугьузвай Санкт-Петербуг шегьердиз акъудна. Гьа йисалай 2019-йисалди хъсан чирвилер, кьатIунар ва зигьин авай лезги руша Санкт-Петербугдин «Зингер» компаниядин ктабрин КIвале кьилин пешекар яз кIвалахна. Грамотайри ва сертификатри шагьидвал ийизвайвал, и везифаярни ада намуслудаказ кьилиз акъудна.

З. Исмаиловадихъ менеджервилин дипломни ава. 2019-йисалай Залина Жавидиновна Эминхуьруьн юкьван школада муаллимвилин кIвалахдив эгечI хъувуна. Ам руководитель тир 1-классда 19 аялди кIелзава. Абуруз кIел-кхьин чирунин карда муаллимди намуслудаказ зегьмет чIугвазва. Идан нетижа яз аялри фасагьатдаказ ктабар кIелзава, гафар, рекъемар кхьизва.

- Залина Жавидиновна неинки чи школада, санлай районда сифтегьан классрин лап хъсан муаллимрикай сад я лагьайтIа, бажагьат зун ягъалмиш жеда, — лугьузва школадин директордин заместитель Р. Рамазановади. — Аялрин чирвилерин дережа, кьатIунар ва зигьин хкажун ва артухарун патал ада тарсара кIвенкIвечи къайдайрикай, таблицайрикай ва аквадай агитациядин маса такьатрикай менфят къачузва. Гьавиляй Залина муаллимдихъ кIвалахда агалкьунарни жезва. Школадин руководство ва аялрин диде-бубаяр адан кIвалахдилай гзаф рази я.

З. Исмаиловадин намуслу зегьмет райондин образованидин управлениди ва школадин дирекцияди са шумудра Гьуьрметдин грамотаяр ва пишкешар гуналди къейднава.

Залина Жавидиновнади гьисабзавайвал, вичи тарсар гузвай аялрикай, абурун гележегдикай фикирзавай муаллим са чIавузни хьанвай нетижайрал рази хьана акъвазна кIанзавайди туш. Ада вичин чирвилер гьамиша артухарун лазим я. И кар З. Исмаиловади вичин чешнедалди субутзава: алай вахтунда ада заочнидаказ Дагъустандин государственный педагогический университетда кIелзава.

Гьа са вахтунда, З. Исмаиловади школадин общественный уьмуьрдани активвилелди иштиракзава.

Люда Кьасумова

Шикилда: З. Исмаилова

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

19