Сувар мубаракна

Малум тирвал, алай йисан 27-март Виридуьньядин театрдин югъ яз къейдна. И юкъуз чи муниципальный райондин информационный агентстводин руководитель Гуьллер Камилова ва «Куьредин хабарар» газетдин культурадин отделдин заведующий Абидин Камилов СтIал Сулейманан тIварунихъ галай Лезгийрин Гьукуматдин музыкадинни драмадин театрдиз мугьман хьана.

И югъ ял ядайди хьуниз килигна, вири инжиклу тавун патал, чна сувар мубарак ийиз чи халкьдин гзаф рикI алай артист – Дагъустандин халкьдин артист, ДР-дин Гьукуматдин премиядин лауреат, «Шарвили» эпосдин суварин премиядин сагьиб Рамазанов Ибрамхалил Рамазановичаз театрдиз атун теклифнавай. Ам тайинарнавай вахтунда атана акъатна.

Хваш-беш авурдалай гуьгъуьниз, чи райондин администрациядин тIварунихъай адаз ва лезги театрдин вири коллективдиз чпин пешекарвилин сувар мубарак авурдалай гуьгъуьниз ихтилат адан уьмуьрдин рекьикай, 53 йисуз артист яз сегьнедал ада арадал гъайи къаматрикай (образрикай) фена.

- Зун тийижирбурни аватIа, — лагьана хъуьрена ам, — чир хьурай: Зун СтIал Сулейман бубадин тIвар алай райондин Куьре Меликан хайи хуьре – Курхуьрел – 1944-йисан 10-июндиз дидедиз хьана.

Хуьруьн школа акьалтIарай-далай гуьгъуьниз 1964-1967-йисара за виликан ГДР-да ГСВГ-да къуллугъ авуна.

1969-йисан майдин вацра СтIал Сулейманан 100 йисан юбилейдин мярекатдал урусрин машгьур шаир Владимир Маяковскийдин къайдада шиир кIелайла, аквадайвал бегенмиш хьана, а чIавуз театрдин кьилин режиссер тир машгьур Багъиш Айдаева заз театрдиз кIвалахал атун теклифна, за еке шадвилелди адан теклиф кьабулна.

Артист хьун, адан сирер чирун патал за институтар, академиярни акьалтIарайди туш. Зун хайи халкьдин арадай акъатнавай халкьдин артист я. Эхь, зун хайи театрдин сегьнедаллаз 53 йис хьанва. И девирда зун са вишелай виниз кьилин ролра къугъвана.

Сифте яз зун «СтIал Сулейман» тамашада муаллим Сердеран ролда къу-гъванай. Гуьгъуьнлай Эседуллагь Нав рузбегован «Фасине» тамашада къугъвай Бурдугу Капитоновичан, «Гьажи Давуд» тамашада къугъвай Сад лагьай тетрдин, Узаир Гьажибегован «Мешеди Ибад» тамашада Гьамбалдин, «Шарвили» тамашада Шарвилидин къаматар ва гьакIни Асеф Мегьманан «Харубег ва ЦIарубег» тамашада къугъвай Харубеган образ тамашачийри еке хушвилелди кьабулна. Исятда зун гъвечIи ролар къугъвазва.

15 йисуз зун Ахцегьа кьиле тухузвай «Шарвили» эпосдин суварик тур гъилеваз Шарвилидин ролда къугъвана. Зун гьакIни «Шарвили» эпосдин суварин премиядин лауреатни я.

Амма вири и тIварарилай ва премийрилай, артист яз, за жуван хайи халкьдин патай авай гьуьрмет еке награда яз гьисабзава.

Шарвилидин веси кхьенвай чи чIехи шаир ва драматург Ибрагьим Гьуьсейнова лагьайвал:

Яшамишрай зи лезги халкь,

Гуьрчегвилин къадир авай! – лагьана эхирдай артистди ва «Шарвилидин веси» хуралай кIелна.

И гуьруьшдин иштиракчийри гуьгъуьнлай театрдин вилик квай СтIал Сулейманан гуьмбетдин вилик шикилар яна, чIехи шаирдин экуь къамат рикIел хкана.

Куьре Абид