Диндин организацийрин векилрихъ галаз гуьруьш

Сулейман-Стальский райондин Кьил Нариман Абдулмуталибова диндин организацийрин векилрихъ галаз совещание кьиле тухвана. Ана гьакIни райондин администрациядин аппаратдин, къайдаяр хуьдай органрин, общественный организацийрин векилри иштиракна.

Совещанидал алай асул месэлаяр гьялунив эгечIдалди райондин Кьил Нариман Абдулмуталибова Украинадин территориядал кьиле физвай махсус серенжемрихъ галаз алакъалу яз арадал атанвай общественно-политический гьаларикай вичин фикирар лагьана. ИкI, ада къейд авурвал, арадал атанвай гьалара властдин структурайринни диндин организацийрин алакъаяр сихбур, санал кIвалахдайбур хьун лазим я. Чи виридан чалишмишвилерни райондин ва адан агьалийрин хушбахтлувилихъ рекье тунвайбур хьун лазим я. Чи уьлкведин руководство са жерге геополитический къарарар кьабулуниз мажбур хьана, адахъ галаз санал дуьньядин къайдани дегиш хьана. Муьжуьд йисан къене Донбассдин ислягь халкьар блокадада яшамиш хьана. Идакай менфят къачуна, НАТО-диз вичин сергьятар гегьеншариз кIан хьана. Украинадин ва Россиядин, гинетикадин жигьетдай мукьва и кьве уьлкведин халкьарин арада къал турдини Запад я, адаз дуьньяда вичин агъавал артухариз кIанзава. Идахъ галаз алакъалу яз чи уьлкведи кьабулай къарарни гьахълуди я, и кардин тереф халкьдини хуьзва. Зун кIевелай инанмиш я хьи, Россияди вичин къуват, гужлувал хуьда, ада политический майдандани вичи кьунвай рехъ, фикир хуьда.

И месэладай совещанидин иштиракчийри Нариман Шамсудиновичан фикиррин тереф хвена.

Совещанидин повесткадихъ галаз кьадайвал РФ-дин Гьукуматди 2019-йисан 5-сентябрдиз 1165-нумрадик кваз акъудай «Об утверждении требований к антитеррористической защищенности объектов (территорий) религиозных организаций и формы паспорта безопасности объектов (территорий) религиозных организаций» постановление кьилиз акъудзавай гьалдикай общественный хатасузвал хуьнин рекьяй райадминистрациядин Кьилин заместитель Абуталиб Фатулаева ва райондин са шумуд мискIиндин имамри малуматар гана. Абурун рахунрай малум хьайивал, муниципалитетдин территориядал диндин 31 объект ала. Зугьрабхуьрел, Испика ва Хпюкьа мискIинар кардик квач.

ДР-дин юстициядин Министерствода регистрация фейи диндин организацийрин хатасузвилин паспортар туькIуьрун патал райондин АТК-ди имамрин Советдихъ галаз санал кIвалах тухузва. Кьасумхуьруьн, ЦIийи поселокдин, Агъа-СтIалрин, Агъа-СтIал Къазмайрин, Герейханован хуьруьн, Эминхуьруьн, ЦIийи Макьарин, КIварчагърин, ДаркIуш-Къазмайрин, Курхуьруьн, Уллу-Гъетягърин, Цмуррин ва Ичинрин диндин идарайрив хатасузвилин паспортар туькIуьрунин, категорирование авунин ва ахтармишна чирунин комиссияр тешкилнавайвилин хабарар агакьарнава. Кьасумхуьруьн кьилин мискIиндиз, Агъа-СтIал Къазмайрин, Эминхуьруьн, ЦIийи Макьарин, ДаркIуш-Къазмайрин, КIварчагърин ва Курхуьруьн мискIинриз абур гьазурнава, ЦIийи поселокдин ва Цмуррин мискIинриз абур куьтягьнавач, амай хуьрерин мискIинриз абур туькIуьриз гъиле ава.

Диндин организацийриз электроэнергия ва газ ишлемишунай лицевой счетар регистрация авунин карда куьмек гунин месэладай ЖКХ-дин ва дуьзмишунин управленидин пешекар Жабраил Агъарзаев ва мискIинрин имамар рахана.

Райондин образованидин управленидин патав гвай ИМЦ-дин директордин заместитель Венера Абдуселимовади диндин векилри умуми образованидин идарайри терроризмдин идеологиядиз акси акъвазунин рекьяй тухузвай профилактикадин серенжемрикай рахунар авуна.

Совещанидал алай месэлайрай райондин имамрин Советдин председатель Гьасан Амаханов рахана, ада гьакIни Рамазандин пак вацра тухудай мярекатрикайни лагьана.

Эхирдай райондин Кьил Нариман Абдулмуталибова мугьман хьунай, метлеблу ва таъсирдай ихтилатар авунай диндин организацийрин векилриз чухсагъул лагьана, пак Рамазандин варз алукьун мубарак авуна.