Экономикадиз – дурумлувал, агьалийриз – хъсан яшайиш

Макъаладин кьил яз гъанвай гафар за Дагъустан Республикадин Кьил Сергей Меликова республикадин Халкьдин Собранидин сессиядал авур рахунрай къачунвайбур я. Гьакъикъатдани, алай вахтунда ибур республикада вилик акъвазнавай кьилин ва асул везифайрикай садбур я. Абурни Россияди Украинада тухузвай махсус операция себеб яз чи уьлкве патал кьабулнавай санкцийрихъ галаз алакъалу я.

Гила заз 5-апрелдиз ДР-дин Кьил Сергей Меликован регьбервилик кваз кьиле фейи ДР-дин Кьилин патав гвай агропромышленный комплекс вилик тухунин Советдин заседанидин кIвалахдикай рахаз кIанзава.

ВКС-дин къайдада заседанидин кIва-лахда Сулейман-Стальский райондин Кьил Нариман Абдулмуталибовани иштиракна.

Заседанидал алай месэлайрикай рахадайла Сергей Меликова къейд авурвал, Россиядин руководстводи агропромышленный комплекс вилик тухуниз екедаказ фикир гузва, эхиримжи вацра и рекьяй са жерге нормативный документар кьабулнава.

ДР-дин Кьили мадни къейд авуна: Россиядин дережада Дагъустанди ири карч алай гьайванрин кьадардал гьалтайла 2-чка, нек гьасилунай 7-чка (СКФО-да 1-чка), сар гьасилунай 1-чка кьазва. Ида къалурзава хьи, Дагъустанда АПК гьамиша кар алай ва кьилин хел яз хьайиди я.

Республикада АПК вилик тухудай мумкинвилер авай проектрикай рахадайла, Сергей Меликова Сулейман-Стальский районда уьмуьрдиз кечирмишзавай «Полоса» инвестпроектни къейдна. Проектдин сергьятра аваз икьван чIавалди 1500 гектарда багълар кутунва, идакай 1000 гектар шуьмягъин багълар я. Им Россияда виридалайни зурба шуьмягъин багъ я.

Заседанидал ДР-дин хуьруьн майишатдин ва суьрсетдин министр Баттал Батталов, премьер-министр Абдулмуслим Абдулмуслимовни рахана.

Эхирдай Сергей Меликова ДР-дин Кьилин патав гвай АПК вилик тухунин Советдин вилик акъвазнавай эвелимжи везифаярни тайин авуна. Абурун арада гатфарин кIвалахар тухун, тумарин фонд арадал гъун, салан майваяр, якIун ва якIунни некIедин продукция гьасилунай инвестицийрин проектар вилик тухун ава.

***

Дагъустан Республикадин Кьил Сергей Меликов ДР-дин Халкьдин Собранидин сессиядални рахана. Ада алай вахтунда арадал атавай общественно-политический гьалариз къимет гана, къенин кризисдин гьалара Республикадин вилик акъвазнавай асул везифаяр къейдна.

ДР-дин Халкьдин Собранидин сессиядал Сергей Меликова авур рахунриз Сулейман-Стальский райондин Кьил Нариман Абдулмуталибова баянар гана.

- Гьукуматдин кIвалахдикай авур гьахъ-гьисабдин рахунра Сергей Алимовича социально-экономический ва общественно-политический чIехи меселаяр къарагъарна, — лагьана Нариман Абдулмуталибова. – Къенепатан политикадин кризисди алай вахтунда чIуру таъсир ийизва, идахъ галаз алакъалу яз республикадин руководстводин кIвалахда социальный хел вилик тухун, экономика дурумлудаказ вилик фин ва агьалийрин яшайиш, сагъ-саламатвал таъминарун эвелимжи буржи яз ама. Федеральный дережадин тежрибалу политик ва управленец яз Сергей Алимовичаз уьмуьрда важиблу вири хилер Дагъустанда еридин жигьетдай виниз тир дережадиз акъудиз кIанзава.

Районда АПК-дин ва сагъарунинни-сагъвал мягькемарунин хилера инвестицийрин зурба проектар уьмуьрдиз кечирмишзава. Район вилик финиз къуллугъзавай «Полоса» ООО Россиядин лап хъсан 10 агропредприятиядик акатзава. Райондин Кьил Нариман Абдулмуталибова къейд авурвал, ихьтин зурба инвестпроектдин тереф Сергей Алимович Меликова хуьни шадвал кутазва.

***

Муниципалитет патал къенин юкъуз важиблубур тир социально-экономический месэлайриз 4-апрелдиз Нариман Абдулмуталибован регьбервилик кваз кьиле фейи райадминистрациядин аппаратдин совещанидални килигна.

Кризисдин ва санкцийрин шартIара экономика дурумлудаказ вилик тухунин рекьяй Оперативный штабдин къарарар ва тапшуругъар кьилиз акъудзавай гьалдикай райадминистрациядин Кьилин заместитель Саид Темирханова малумат гана.

Райондин агропромышленный сектордин кIвалахдикай УСХиП-дин начальникдин везифаяр тамамарзавай Къазиагьмед Къазиагьмедов рахана. Ада лагьайвал, гатфарин чуьлдин кIвалахар пландин къайдада кьиле физва. Уьзуьмчивилел ва багъманчивилел машгъул тир майишатарни виликди физва. Техилдин культураяр цадай майданар 1023 гектардив агакьарун планламишнава…

Агросектор вилик тухунин ва адаз куьмек авунин месэлайрикай совещанидал райондин Кьил Нариман Абдулмуталибовни рахана.

Хазран Кьасумов