Чар авай фу

Халкьдин арада «чар авай фу», «шткар» тIварар акьалтнавай и фу лезгийрин рикI алайбурукай сад я. Адет яз, ам чIем ва я чIемин кIанер экъуьрна чрада. И фу гьа чранмаз, чимиз-чимиз нисидихъ галаз неда.

Чар авай фу гъазурун патал герек къведа:

гъуьр — 2 кг;

кьел — 2 ч.тI.

яд — 1,500-1,700 л.;

чIем ва я гъери, я тахьайтIа чIемин кIанер — 500 гр.

Гъуьруькай адетдин тегьерда (са акьван кIеви тушиз), тини ишинда. ЧIем цIурурда. Тини сад хьтин, са къайдадин кIусариз пайна, кIвалакIар кьада. Ахпа кIвалакIар жезмай кьван кьелечIдиз аладарна, чкалар гьазурда, абура чIем экъуьрна, элкъуьриз-элкъуьриз кIватIна, мад кIвалакIар кьада. КIвалакIар са къайдада кьелечIдиз аладарна, ифенвай сачунал чрада.

Эвела са пад 5-7 декьикьада, ахпа муькуь пад элкъуьрна, яр акъатдалди чрада. Хъукъун тавун патал чрай фу суфрадик кутада.

Нарима Агьмедова, ашпаз