Кьасумхуьруьнви – Минздравдин чемпион

Мукьвара Рязань шегьерда Россиядин здравоохраненидин министерстводин кIвенкIвечивал патал дзюдодай уьлкведин медицинадин ва фармацевтикадин ВУЗ-ра кIелзавай студентрин арада 6-сеферда чемпионат кьиле фена. Ана Рязандин, Дагъустандин, Москвадин, Башкортостандин, Ижевскдин, Тюмендин, Кубандин, Ставрополдин, Саратовдин ва Казандин ВУЗ-ра кIелзавай 59 спортсменди иштиракна. Абуру заланвилин 11 категориядай бягьсер тухвана.

Чемпионатда 73 килограммдин заланвиляй майдандиз В. И. Разумовскидин тIварунихъ галай Рязандин медицинадин университетдин стамотологиядин факультетдин 5-курсунин студент Гьажирамазан Ягъибегов экъечIна. Ери-бине Кьасумхуьрелай тир ада Вирироссиядин чемпионатда сифте гуьруьшда Кубандин медуниверситетдин студентдин винел 10:0 баллрин гьисабдалди, гуьгъуьнин гуьруьшра Тюмендин медуниверситетдин ва Ижевскдин медакадемиядин студентрал-спортсменрал михьи гъалибвал къачуна.

Финалда Гь. Ягъибегов Ставрополдай тир гзаф къуватлу спортсмендихъ галаз гуьруьшмиш хьана. Гуьруьшдин асул вахтунда гъалибчи тайинариз хьанач, кьведахъни сад хьтин баллар авай. Алава вахтунда Гьажирамазана гъалибвал къачуна, Рязандин медуниверситетдин тарихда сифте яз анин студентдикай Россиядин минздравдин чемпион хьана.

Гь. Ягъибегова университетда физвоспитанидин кафедрадин старший преподаватель Николай Клюшникован ва кафедрадин заведующий Михаил Фоминан гъилик вердишвилер къачузва, устадвал хкажзава.

Къейд авун лазим я хьи, Гь. Ягъибегова сифтедай Кьасумхуьрел кардик квай самбодинни дзюдодин ДЮСШ-да тренерар тир Рамазан, Юрий ва Тельман Къурбановрин гъилик вердишвилер къачуна. Гьажирамазан Дагъустандин кIвенкIвечивал патал ва Вирироссиядин хейлин турниррин гъалибчи ва призерни я.

Чаз Гь. Ягъибеговахъ кIелуна ва спортда мадни еке агалкьунар хьана кIанзава.