Къанал къайдадиз хкана

Муниципалитетдин мулкунал майишатрин арайринбур тир 8 къанал ала. Санлай абурун яргъивили 183,5 километр тешкилзава. «Минмелиоводхоз РД» ФГБУ-дин Самур-Гуьргенчайдин филиалдин директор Фикрет Шерифова чаз лагьайвал, хуьруьн майишатдин суьрсет гьасилзавайбуру багълариз, уьзуьмлухриз, магьсулрин никIериз, салариз-бустанриз гатфарин ятар гунин кIвалахда четинвилер тахьун патал вири къаналар михьна, ремонт хъувуна вахтунда акьалтIарна.

Гьа са вахтунда, гьар жуьре себебралди, къаналар къайдадикай хкатзавай дуьшуьшарни жезва. ИкI, и йикъара ЦIийи хуьруьн кIанихъай, Гуьлгери вацIай «Герейхановский» къаналдиз яд къачузвай хивелай са шумуд виш метрдин агъадай, къаналдин къерех ци тухвана, яд вацIуз авахь хъийиз хьана. И хабар хьанмазди райадминистрациядин Кьилин 1-заместитель Лацис Оруджев ва хуьруьн майишатдин управленидин начальник Къазагьмед Къазагьмедов чкадал фена, къанал къайдадиз хкун патал серенжемар кьабулна. Кьиле филиалдин директор Фикрет Шерифов аваз, ковщ галай трактор ва гужлу бульдозер желб авуналди, Самур-Гуьргенчайдин филиалдин махсус бригадади къаналдин ци тухванвай участок къайдадиз хкана.

Гьа са вахтунда «Минмелиоводхоз РД» ФГБУ-дин филиалдин директор Фикрет Шерифова чаз лагьайвал, хуьрера суьрсет гьасилунал машгъул тир гзаф арендаторри арендадин пулар гузвач, ида цин къаналар ремонт хъувунин кар четинарзава. Пул вирида гун чарасуз я.

Текст кхьейди ва шикил ягъайди Х. Кьасумов я