Руьгь кутадай гъалибвал

Гъалибвилин суварин 77 йис. И Гъалибвални чи халкьдин гъиле регьятдиз гьатначир. 1941 -йисан 22-июндиз фашистрин Германиядин кьушунри Советрин Союздал вегьенай. Душманди Балтийский гьуьлелай ЧIулав гьуьлел кьван яргъи хьанвай сергьят хуьзвай чи пограничный частарал гьужумна. Гитлеран генералри лап кар алай кьушунар Шяуляйдин, Каунассдин, Гродне-Волындин, Рава-Русский ва Бродский терефрихъ рекье туна, амма пограничникри абуруз терсдаказ жаваб гана, душмандин гзаф аскерар, техника барбатIна. Пограничникри, акси гьужумар хъувуна, немсер кьулухъди, сергьятдилай анихъ хъфиниз мажбурна. Анжах са Шяулайдин патарив фашистрин 300 танк тергна. 22-июндин нисинлай алатайла, чи пограничникриз куьмек яз Яру Армиядин кьушунарни атана. Женгер гьич фикирдизни гъиз тежедай кьван къизгъинбур, ивияр экъичдайбур, гьужум-гьужумдин кIула авайбур тиртIани, чи пограничникри, аскерри эхиримжи нефесдалди дяве ийизвайтIани, къуватар барабарбур тушир. Дяведин анжах са юкъуз чи зенитчикри душмандин 76 самолет тергна, 5000 аскер есирда кьуна. ЯтIани, чибур кьулухъ чIугуниз мажбур хьана. Виликамаз гьазур хьанвай ва аскеррин, яракьрин, чилинни цавун техникадин жигьетдай артухвал авай душмандин хура акъвазун лап четин месэладиз элкъвена. ЯтIани, вири азиятриз, мусибатриз дурум гана, советрин халкьар далудихъ галай Яру Армиядин командирри, аскерри тежедай хьтин викIегьвилер къалурна ва душман вичин чилел барбатIна.

Къе немсерин кьушунар тар-мар авур ва Европадин халкьарни фашистрин лукIвиликай азад авур Яру аскерар лап тIимил аматIани, абурун кьегьалвилер чна гьамиша рикIел хуьзва. Европада, къунши Украинадани кваз мад фашистрин, нацистрин дестейри кьил хкажзавай вахтунда Дуьньядин кьвед лагьай ва Ватандин ЧIехи дяведин тарсар рикIелай алудун герек къвезвач. АкьалтIай чIуру ниятар аваз цIийи дявейрик цIай кутаз, фашизм кIвачел ахкьалдариз кIанзавайбур анжах пашман жеда. Абурун гьерекатрихъ чпи гуьзлемишзавай нетижаярни жедач. Абур дуьньядин сагълам, ислягь фикиррал алай вирида лянетламишзава. Чаз я фашистарни, я нацистарни, я дявеярни герек авач. Россиядин халкьариз вири уьлквейрихъ галаз дуствилелди ислягь цавун кIаник яшамиш жез, зегьмет чIугваз, къени крар ийиз кIанзава. Гьа ихьтин уьмуьр, яшайиш патал чи багърийри дяведа чпин чанарни гана, душмандиз рикIелай тефидай ягъунарни кьуна. Абур гьамиша чи рикIера амукьда.

Асият Мирзалиева