Меню
6+

Сетевое издание «Кюре»

06.05.2022 10:22 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Игитар гел галачиз квахьдайди туш

1941-1945-йисара кьиле фейи Ватандин ЧIехи дяве рикIелай алат тийидай вакъиа хьана. Ингье, дяве куьтягь хьана 77 йис тамам хьанва. ЯтIани, дяведиз фейи гзаф инсанрикай къени тамам, гьакъикъи делилар авач. Дяведин йисара гзафбуруз «Гел галачиз квахьна» гафар кхьенвай пуд пипIен кагъазар гзаф хтанай.

- Чи буба кьейи чка кьванни чир хьанайтIа, рикIиз секин жедай, — лугьудай инсанар гилани гзаф ава.

Кьасумхуьруьн (гилан Сулейман-Стальский) райондин ХипитIрин хуьряй тир Мурадагъаев Алимурадакайни яргъал йисара адан багърийриз са хабарни авачир, ам гел галачиз квахьнавайбурун списокда авай.

Алатай йисуз Эминхуьруьн юкьван школада муаллим яз кIвалахзавай Шагьламаз ва ДЮСШ-да тренер яз кIвалахзавай Мурад Мурадагъаеври чпин чIехи буба Алимурадакай делилар жагъурунин мураддалди Россиядин Яракьлу Къуватрин центральный архивдиз чар кхьена. Са тIимил вахт алатайла, архивдай Алимурад Мурадагъаеван женгинин рехъ, адан кьегьалвилер къалурзавай жавабдин чар хтана. Ана ихьтин делилар ава: Алимурад Мурадагъаев 1918-йисуз дидедиз хьана. Адаз 1938-йисан сентябрдин вацра Дагъустан АССР-дин Кировский РВК-дай Яру Армиядин жергейриз эвер гана. Алимурад Мурадагъаева гражданский дяведа иштиракна.

А. Мурадагъаев 1942-йисан сифте кьилера ВКП(б)-дин кандидатвиле, и йисан эхирра членвиле кьабулна.

Центральный архивдай хтай чарарихъ А. Мурадагъаеваз Ватандин ЧIехи дяведа къалурай кьегьалвилерай наградаяр ганвайвилин гьакъиндай шагьидвалзавай наградной листерин копиярни гала. Абурай малум жезвайвал, Алимурад гвардиядин лейтенант, Сталинградский фронтдин 81-гвардейский стрелковый дивизиядин 233-гвардейский стрелковый полкунин 3-миноментный ротадин миноментный взводдин командир я.

1943-йисан 11-январдиз Сталинграддин областдин Цибенко хутордин патав Алимурада, миноментдай гуьлле гуналди, немсерин 50-дав агакьна аскерар ва кьве автомашин тергна. Гьа и йисан 26-январдиз А. Мурадагъаева вичин взводдихъ галаз санал Сталинграддин куьчейра кьиле фейи женгера 50-далай виниз душмандин аскерар ва офицерар тергна.

Гьа и юкъуз А. Мурадагъаева ва ада команда гузвай взводди Сталинграддин вокзал душмандикай хуьн патал кьиле фейи женгера штурмовой дестедиз немсерин 200-дав агакьна аскерар ва офицерар есирвиле кьуниз куьмекна. И кьегьалвилерай А. Мурадагъаеваз «За боевые заслуги» медаль гана.

Сталинградский фронтдин 233-стрелковый полкунин командир майор Титоренкодин къул алай наградной листинай малум жезвайвал, лейтенант Алимурад Мурадагъаева регьбервал гузвай взводди 1943-йисан 6-7 июлдин йикъара Белгородский райондин Ближняя Игуменка хуьр ва 1943-йисан 14-июлдиз Шахово хуьр патал немсери авур гьужумдин вилик пад кьуна, 28 кас немсерин аскерар ва офицерар, гьакIни миноментрай гуьлле гуналди душмандин миноментный батарея ва миноментный ротадин са расчет тергна.

И кьегьалвиляй лейтенант Алимурад Мурадагъаеваз «Красная Звезда» орден гана.

Маса наградной листинай малум жезвайвал, А. Мурадагъаевахъ «За оборону Сталинграда» медални авай.

Женгера кьегьалвилер къалурай Алимурад Мурадагъаев Сталинграддин областда стхавилин сурара кучуднава.

Игитар рекьидайди туш, лугьузва мисалда. Алимурад Мурадагъаеваз хьиз гъурбатда сурар кьисмет хьайибурни несилрин рикIера амукьда.

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

6