Гьар са карда чешне я

КIвалахда къазанмишнавай агалкьунрай ва гзаф йисарин бегьерлу зегьметдай Россиядин Игит Радим Халикьован тIварунихъ галай Кьулан-СтIалрин умуми образованидин школадин муаллим Халилбеков Халилбег Жарулаевичаз «Дагъустан Республикадин лайихлу муаллим» лагьай гьуьрметлу тIвар ганва. Талукь тир Указдал Дагъустан Республикадин Кьил Сергей Алимович Меликова 2022-йисан 28-мартдиз къул чIугуна.

Награда вахкунин мярекат Махачкъалада Россиядин йикъан сергьятра аваз кьиле фена.

Дагъустандин Кьил Сергей Алимович Меликова муаллимдиз лайихлу тIвар гун рикIин сидкьидай мубаракна, адахъ кIвалахда мадни еке агалкьунар хьана кIанзавайди къейдна.

Республикадин дережадин лайихлу тIвар ганвай муаллим Халилбег Халилбеков вуж я? Зун кIевелай инанмиш я хьи, суал квай и келимаяр кIелнамазди, гьар са касди вичи-вичик фикир ийида – вуж я кьван районда Халилбег муаллим чин тийизвайди?!

Гьакъикъатдани, Х. Халилбеков районда гзафбуруз неинки вичин пешедал рикI алай муаллим яз, гьакIни хъсан общественник, хуш къилихдин, ширин мез авай, масадан дердиникай хабар кьадай инсан язни чида.

- Халилбег Жарулаевич, са рахунни алачиз, районда хъсан муаллимрикай сад я, — лугьузва райондин образованидин управленидин начальник Гьуьсейн Шихбабаева. – Ада районда ва республикада кьиле тухузвай образованидин, женгининни-спортдин ва маса мярекатра иштиракзава, ихьтин мярекатар вичи кIвалахзавай школада ва райондин образованидин маса организацийрани тешкилзава. Халилбег муаллимдиз гьахълудаказ ва дамахдивди «образованидин чирагъ» лугьуз жеда. Адан кIвалахдилай чун гзаф рази я.

Х. Ж. Халилбеков 1958-йисуз тIебиатдин гуьзел чкадал экIя хьанвай Векьелрин хуьре дидедиз хьана. 1961-йисуз, дагъ патан маса са шумуд хуьруьн хьиз, Векьелрин жемятни Кьулан СтIалдал куьч хьана. Халилбековрин лежбер ва зегьметдал рикI алай хизанди хуьре бине кутуна.

- Муаллимвилин пеше гьеле школада кIелзавай йисара заз гзаф бегенмиш тир, — лугьузва Х. Халилбекова. – Диде-бубадизни закай муаллим хьана кIанзавай. Гьа икI зун, 1977-йисуз Кьулан СтIалрин юкьван школа акьалтIарна, рикIе авай мурад кьилиз акъудун патал, Дагъустандин государственый университетдин филологиядин факультетдик экечIна. 1982-йисуз анаг акьалтIарна, диплом вахчурла, за зун виридалайни бахтлу инсан яз гьисабнай. РикI алай пешедин иеси хьунал за дамахзава.

Вичин зегьметдин рехъ Х. Халилбекова Агъул райондин РичIарин хуьре урус чIаланни литературадин муаллимвиле кIвалах авунилай башламишна. Пуд йисуз ада вичин рикI алай пешедай кIвалах авун КIварчагърин юкьван школада давамарна.

1986-йисалай инихъ Халилбег Жарулаевича вичи акьалтIарай Кьулан-СтIалрин школада зегьмет чIугвазва, ам ОБЖ-дин муаллим я.

- Халилбег Жарулаевич чи школадин дамах, гьар са карда чи даях я, — лугьузва школадин директор Ифриз Бабаевади. – Вичин пешедал хьиз, муаллимдин рикI аялрални ала, аялризни ам кIан я. Халилбег Жарулаевичакай рахадайла Муаллим, Инсан, Общественник гафар чIехи гьарфарилай кхьиниз лайихлу я. Адаз республикадин лайихлу муаллим лагьай тIвар гунал чи школадин муаллимри, кIелзавайбуру ва абурун диде-бубайри шадвалзава.

Тежрибалу муаллим, гьа са вахтунда, 2009-йисалай Сулейман-Стальский райондин профсоюзрин тешкилатрин координационный Советдин председатель, Вирироссиядин «Юнармия» гьерекатдин райондин штабдин, ОБЖ-дин методикадин курсарин руководитель, хуьруьн поселенидин Собранидин депутатни я.

Къейд авун лазим я хьи, школада «Россиядин Игит Радим Халикьован тIварунихъ галай женгинин ва зегьметдин баркалладин музей», женгинни-спортдин городок, ОБЖ-дин кабинет кардик ква. Абур туькIуьруникни Халилбег Жарулаевича лайихлу пай кутуна.

Вич отставкада авай офицер тир Халилбег муаллимди гьазурнавай и школадин ва райондин командайри женгининни-спортдин «Гъалибвал», «Жергеда акъвазайтIа жеда», «Зарница», «Президентдин акъажунар» къугъунра, армиядин жергейриз эвер гудай яшдив агакь тавунвай жегьилрин арада кьиле тухвай спартакиадайра са шумудра 1-3-чкаяр кьуна.

Тежрибалу муаллим ва хъсан тешкилатчи тир Халилбег Жарулаевич «Дагъустан Республикадин халкьдин образованидин отличник», «Россиядин Федерациядин образованидин гьуьрметлу работник», «Дагъустан Республикадин лайихлу муаллим» тIварарин, «Россиядин ватанперес» медалдин, гзаф кьадар грамотайрин сагьиб, чешнелу хизандин кьилни я.

Лайихлу муаллимвилин тIвар мубарак авуналди, эхирдай чаз лугьуз кIанзава: вахъ акьалтзавай несилдиз дерин чирвилер ва ватанпересвилин тербия гунин карда мадни еке агалкьунар хьурай, гьуьрметлу Халилбег Жарулаевич!

Х. Гьажибалаев