Итижлу гуьруьш

Жегьилрин йикъан вилик Сулейман-Стальский райондин спортдин, туризмдин ва жегьилрин крарин рекьяй Комитетди (директор Ч. Абдулмежидов), образованидин учрежденийрин ва общественный организацийрин иштираквал аваз спортдин мярекатар ва машгьур спортсменрихъ галаз гуьруьшар кьиле тухвана. ИкI, Агъа-СтIалрин мини-футболдин майдандал жегьилар машгьур спортсмен, грекринни-римлуйрин арада кьве сеферда дуьньядин чемпион, спортдин борьбадай Беларусь Республикадин Федерациядин Президент Алим Селимовахъ галаз гуьруьшмиш хьана.

Гуьруьшда Аргентинадай тир футболдай пешекар тренер Хуан Альберто Вильянуэва Пласенсияди иштиракна.

Алим Селимова аялриз ва жаванриз вичин спортдин рекьикай, спортда къазанмишай агалкьунрикай, гъалибвилихъ финин «сирерикай» итижлу ихтилатар авуна, абурун патай хьайи суалриз жавабар гана.

Гуьруьшдин эхирдай жегьилри машгьур спортсменрихъ галаз рикIел аламукьдай шикилар яна.

Хазран Кьасумов