Меню
6+

Сайт «Кюре»

24.06.2022 11:51 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Муслимов Салигь Шабанович

И йикъара 85 йисан яшда аваз философиядин илимрин доктор, ДГУ-дин профессор Салигь Шабанович Муслимов регьметдиз фена.

С.Ш.Муслимов 1937-йисан 13-октябрдиз Кьасумхуьруьн райондин ЦицIигърин хуьре дидедиз хьана. Агалкьунралди Дербентдин педколледж акьалтIарайдалай кьулухъ ам ДГУ-дин тарихдинни филологиядин факультетдик экечIна. Гуьгъуьнлай кьуд йисуз мектебда муаллим яз кIвалахна. 1965-йисалай С.Муслимов илимдин рекьел элячIна, аспирантурадиз гьахьна. Ам жергедин муаллимвилелай республикадин кесерлу вуздин профессордин дережадал кьван виликди фена. 1970-йисуз — илимрин кандидатвилин, 1989-йисуз докторвилин диссертацияр хвена.

С.Муслимова вичин вири уьмуьр илимдин рекьиз бахшна. Адан къелемдикай илимдин 200-далай гзаф макъалаяр, учебникар, пособияр, монографияр хкатна. Адан регьбервилин алакьунар себеб яз, Дагъустанда 2002-йисалай философиядин «Камалдин ван» журнал акъатзава.

Кафедрадин профессор яз, С.Муслимова илимдин са шумуд кандидат гьазурна. Жегьилрихъ галаз кIвалахун, абуруз илимдин сирер чирун алимдин рикI алай крарикай сад тир. Ада Дагъустанда философиядин илим дериндай ахтармишуниз кьетIен фикир гузвай, Урусатдин гуманиствилин жемиятдин Дагъустанда авай отделенидин председателдин везифаяр тамамарзавай.

Илимдин хиле агакьунрай С.Муслимоваз 1998-йисуз — «РД-дин илимдин лайихлу деятель», 2002-йисуз «РФ-дин кьилин пешекарвилин образованидин гьуьрметлу къуллугъчи» тIварар гана.

С.Муслимова лезги халкьдин уьмуьрда активнидаказ иштиракзавай. Ам Махачкъалада кьиле физвай лезгийрин саки гьар са мярекатда аквадай. Санал кIвалахай юлдашри, ярар-дустари, чирхчирри алим къени инсан, гъавурда авай пешекар, чIехи ватанперес хьиз рикIел хкизва. Ам чи рикIерани гьахьтинди яз амукьда.

С. М. Темирханов, Ш. Гь. Мегьамедханов, Л. А. Оруджев, А. Д. Джаватов, А. Б. Фатулаев, Р. А. Абдулазизов, А. А. Мейланов, А. Б. Асланов, И. М. Ризаев, Н. Н. Эфендиев

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4