Олимпиадайрин иштиракчияр алхишна

21-июндиз райондин Кьил Саид Темирханов Всероссийский ва региональный олимпиадайрин гъалибчийрихъ ва призеррихъ галаз гуьруьшмиш хьана.

Гуьруьшда райадминистрациядин Кьилин 1-заместитель Лацис Оруджева, РУО-дин начальник Гьуьсейн Шихбабаева ва «Иман» мергьеметлувилин фондунин векил Мурад Ханбалаева иштиракна.

Дагъустан Республикадин илимдинни образованидин министерстводин дипломриз 11-классрин ученикар: Карина Алимурадова (Испикрин СОШ) ва Милана Гьусейнова (ЦIийихуьруьн СОШ), 10-классрин ученикар: Шамиль Тагьиров (ЦIийихуьруьн СОШ) ва Мадина Алиева (Агъа-СтIал Къазмайрин СОШ), 9-классрин ученикар: Амина Шихрагьимова (Курхуьруьн 1-нумрадин СОШ), Хадижа Зейналова (Герейханован 1-нумрадин СОШ) ва Марият Шамсудинова (КIварчагърин СОШ) лайихлу хьана. Абуруз гьакIни «Иман» мергьеметлувилин фондунин патай пулдин пишкешарни гана.

Райондин Кьил Саид Темирханова ва «Иман» мергьеметлувилин фондунин векил Мурад Ханбалаева аялриз олимпиадайра иштирак авунай чухсагъул малумарна ва абурухъ гележегда мадни еке агалкьунар хьана кIанзавайди къейдна.