Россиядин Игитдин турнир

Сулейман-Стальский райондин 1-нумрадин ДЮСШ-дин спортдин залда Россиядин Игит Радим Халикьов рикIера хуьнин лишан яз волейболдай XVII-районрин уртах турнир кьиле фена.

Турнир ачухунин мярекат лагьайтIа, Радим Халикьован тIварунихъ галай Кьулан-СтIалрин юкьван школада хьана. Ана райондин Кьилин везифаяр вахтуналди тамамарзавай Лацис Оруджева, хуьруьн АСП-дин кьил Марат Исмаилова, районда кардик квай спортдин, туризмдин ва жегьилрин крарин рекьяй Комитетдин директор Чингиз Абдулмежидова, школадин директор Ифриз Бабаевади, Игитдин стха Насир Халикьова иштиракна. Абуру Игитдин гуьмбетдал цуькверин таж ва цуьквер эцигна, са декьикьада кисна акъвазуналди, Игит Радим Халикьован экуь къамат рикIел хкана.

Райондин 1-нумрадин ДЮСШ-дин куьмекни галаз спортдин, туризмдин ва жегьилрин крарай Комитетди тешкилнавай турнирда Сулейман-Стальский, Хив ва Ахцегь районрин командайри иштиракна. Къизгъиндаказ кьиле фейи акъажунра 1-чка Курхуьруьн командади кьуна.

2, 3 ва 4-чкайриз, талукь тирвал, АрхитIрин (Хив район), Агъа-СтIалрин хуьрерин ва Ахцегь райондин командаяр лайихлу хьана. Абуруз медалар, грамотаяр ва пулдин призар гана.