Агьалияр кьабулна

Алай йисан 22-июлдиз райондин Кьил Саид Темирханова чпихъ дерди-бала, арза-ферзе авай хуьрерин агьалияр кьабулна. Арзаярни, асул гьисабдай, чеб кIвалахдалди таъминарун, кIвалериз ва социальный объектрал экверин линияр гъунин, яшайишдин кIвалер эцигдай чилин участокар гунин, материальный жигьетдай куьмек авунин, коммерческий объектриз герек документар гьазуриз куьмек авунин патахъай тир.

Кьилди къачуртIа, Арсен Абдулмуслимова (Кьасумхуьр) ва Марият Алиевади (Вини-СтIал) кIвалериз электрикдин эквер гъунин патахъай куьмек гун тIалабна. Райондин Кьили и кардин патахъай хуьрерин поселенийрин кьилерихъ ва РЭС-дин руководстводихъ галаз санал и месэладиз килигун «ЖКХ и благоустройство» МКУ-дин директор Т. Абдулаеваз тапшуругъ гана.

ЦIийи Макьарилай тир Алина Алиева райондин Кьилин патав яшамишдин кIвалер эцигдай чилин учсасток кIанз атанвай.

Санлай къачурла, и юкъуз райондин Кьилин патав Кьасумхуьрелай, Вини-СтIалдилай, ЦIийи Макьарилай, Алидхуьрелай, Герейханован хуьряй тир 10 кас атана. Абурухъ С. Темирханова дикъетдивди яб акална, са бязи месэлаяр гьялунин патахъай АСП-рин кьилериз, талукь къуллугърин руководителриз тапшуругъар гана.

Арзадиз атай агьалийрин месэлаяр гьялунин кIвалах Саид Темирханова вичин гуьзчивилик кутуна.

Асият Мирзалиева