Гуьруьшдал орден вахкана

Сулейман-Стальский райондин Кьил Саид Темирханова Украинада кьиле физвай махсус серенжемда телеф хьайи районэгьлийрин хизанрихъ галаз гуьруьшар тухузва, абуруз башсагълугъвал гузва. Алатай гьафтеда райондин Кьил махсус серенжемда игитвилелди телеф хьайи Арсен Гьабибован багърийрихъ галаз гуьруьшмиш хьана.

Райондин Кьил Саид Темирханова чи аскерри махсус серенжемда районэгьлийри викIегьвилер къалурзавайди, Ватандин вилик къуллугъдин рекьяй хиве авай буржи тамамарунин карда акьалтIай кьегьалвилер къалурзавайди къейдна.

Райондин Кьили Арсен Гьабибован багърийриз башсагълугъвал гана, махсус серенжемда къалурай кьегьалвиляй Арсен Гьабибов лайихлу хьайи (кьейидалай гуьгъуьниз) орден «Мужества» регьметлудан уьмуьрдин юлдашдив вахкана.

Чаз алава хъийиз кIанзава хьи, 1989-йисуз дидедиз хьайи А. Гьабибова ЦIийи поселокдин юкьван школа акьалтIарна. Комсомольск на Амуре шегьерда армиядин жергейра къуллугъна. 2013-йисалай ада контрактдай Крым Республикада (Симферопольский район, поселок Перевальное) РФ-дин Яракьлу Къуватрин жергейра къуллугъ ийиз эгечIна.

2017-йисуз ам эвленмиш хьана. Арсен Амрулагьович ва Полина Тагьировна Гьабибоврин хизанда кьве аял чIехи жезва: гада Саид ва руш София.

Украинада махсус серенжем кьиле тухуз эгечIай сифте йикъара старший сержант Арсен Гьабибов гуьгьуьллувилелди Украинадиз фена.

2022-йисан 3-мартдиз Украинадин Николаевский областдин Баштанка шегьердин патарив кьегьал хци чи аскеррив ацIанвай женгинин машин ва юлдашар артиллериядин тупарикай-цIукай къутармишна, вич игитвилелди телеф хьана.

Арсен Гьабибован экуь къамат эбеди яз халкьдин рикIера амукьда.

 Хазран Кьасумов