Кьегьалар рикIел хкунин лишан яз

Алай йисан 1-июлдиз, Кьасумхуьрел алай аскеррин-интернационалистрин женгинин Баркалладин аллеяда, дяведин гьерекатрин ветеранрин йикъаз талукь яз, кьегьалар рикIел хуьнин митинг кьиле фена. Ам райондин Кьил Саид Темирханова, райадминистрациядин Кьилин 1-заместитель Лацис Оруджева, райадминистрациядин Кьилин заместителри, «Российский Союз ветеранов Афганистана» Россиядин умуми общественный организациядин райондин отделенидин председатель Ислеман Ризаева, военный комиссар Райзудин Женетова, Афгъанистандин дяведин ветеранри, Чечняда ва маса регионра кьиле фейи дяведин иштиракчийри аллеяда аскеррин-интернационалистрин памятникдал цуьквер эцигунилай башламиш хьана.

Дяведин къурбандар рикIера хуьнин лишан яз мярекатдин иштиракчияр са декьикьада кисна кIвачел акъвазна. Россиядин Гимн яна.

Митинг ачухунин сифте гаф райондин Кьил Саид Темирханов рахана.

- Гьуьрметлу ветеранар, къенин митингдин иштиракчияр! – лагьана Саид Темирханова. – Къе чун аскеррин-интернационалистрин аллеяда дяведин гьерекатрин иштиракчийриз гьуьрмет авунин, женгера телеф хьайибур рикIера хуьнин лишан яз кIватI хьанва. Гьам Россиядин территориядал, гьамни адалай къеце кьиле фейи женгинин гьерекатра чи гзаф жегьилри кьегьалвилер къалурна, чи уьлкведин аслу туширвал ва игьтияжар хвена. Кьегьалвиляй, ватанпересвиляй за квез чухсагъул лугьузва. Алай вахтунда женгерин гьерекатрин иштиракчийри акьалтзавай несилдин арада ватанпересвилин еке кIвалах тухузва. И кIвалахдилайни райондин администрация рази я. Къенин митинг чи уьлкведин Яракьлу Къуватри Украинада женгинин махсус операция кьиле тухузвай вахтунда физва, ана чи офицерри ва аскерри бубайрин баркаллу адетриз вафалувал къалурзава, ислягь халкьар миллетчивиликай хуьзва. Гьелбетда, РагъакIидай патан къуватри Россиядин ва ДНР-динни ЛНР-дин ислягь халкьдин аксина еке техника, къуватар ишлемишзава. Зун кIевелай инанмиш я хьи, чун гьахълувилин рекье ава, гьавиляй чун гъалибни жеда. Дяве мусибат я, гьайиф хьи, дяве себеб яз инсанар кьинин дуьшуьшарни жезва. Заз къе дяведа телеф хьайи кьегьалрин багърийриз мад сеферда башсагълугъвал гуз кIанзава.

Къенин югъ са патахъай лишанлуди, муькуь патахъай пашманвилинди я. Гьавиляй заз дяведин иштиракчийрихъ мягькем сагъламвал, кьилелни михьи цав хьун кIанзава.

Митингдал гьакIни «Российский Союз ветеранов Афганистана» Россиядин умуми общественный организациядин райондин отделенидин председатель Ислеман Ризаев, Сулейман-Стальский ва Кьурагь районрин уртах военный комиссар Райзудин Женетов, дявейрин гьерекатрин, къайдаяр хуьдай органрин ветеранар рахана.

Митингдал эхирдай Алкьвадрин юкьван школадин ученик, гзаф кьадар фестивалрин лауреат Мартин Саидова ватанпересвилин манияр лагьана.