Образованидин работникрин совещание

Райондин Кьил Саид Темирханован, райадминистрациядин Кьилин 1-заместитель Лацис Оруджеван иштираквал аваз райондин образованидин организацийрин руководителрин нубатдин совещание кьиле фена.

Совещание райондин образованидин управленидин начальник Гуьсейн Шихбабаева ачухна ва кьиле тухвана.

Гьуьсейн Шихбабаева ва образованидин управленидин патав гвай ИМЦ-дин директор Муминат Бабахановади совещанидин иштиракчияр 2022-йисан ГИА-дин нетижайрихъ галаз танишарна. Абуру къейд авурвал, гъиле авай йисуз ЕГЭ вахкун патал Кьасумхуьруьн 1-нумрадин юкьван школадин бинедаллаз 181-нумрадин ППЭ-ди кIвалахна. Экзаменрин нетижаяр са акьван тариф ийиз жедайбур хьанач. ИкI, урус чIалай экзамен 259 выпускникди вахкана. Абурукай 40 выпускникди 80-далай виниз баллар къачуна, 26 выпускникдивай гайи тапшуругъар кьилиз акъудиз хьанач.

«За особые успехи в учебе» медаль къачуз кIанзавай 61 касдикай анжах 30 выпускникди бес кьадар баллар къачуна.

2022-йисуз ОГЭ 553 выпускникди вахкана.

Экзаменар вахкунин тамам нетижаяр мукьвал тир вахтара тайин жеда.

Райондин образованидин управленидин начальникдин заместитель Къачабег Аминова совещанидал образованидин идарайра ремонтрин кIвалахар кьиле тухузвай гьалдикай малумат гана. Ада къейд авурвал, алай вахтунда райондин образованидин 4 организацияда капитальный ремонтрин кIвалахар кьиле тухузва. Ремонтрин кIвалахар тамамаруни 45 процент тешкилзава.

Совещанидал алай месэлайриз баян гун яз, райондин Кьил Саид Темирханова къейд авурвал, республикадин руководстводин куьмекни галаз эхиримжи вахтара образованидин объектар эцигуниз ва капитальный ремонт авуниз екедаказ фикир гузва. Ремонт ийиз гъиле авай 4 школадилай гъейри, Герейханован аялрин бахчадин дарамат ремонт хъувунни пландик кутунва. Агъа-СтIалрин Къазмайрин школадин цIийи дарамат эцигна акьалтIарнава. Алай вахтунда Герейханован 2-нумрадин юкьван школадин цIийи дарамат ва ДаркIуш-Къазмайрин аялрин бахчадин дарамат эцигунин кIвалахар кьиле тухузва. Пуд хуьре къведай йисуз эцигдай объектрин проектар гьазурунин кIвалахарни кьиле тухузва.

И месэладай совещанидал вичин фикирар ва теклифар гваз райадминистрациядин Кьилин 1-заместитель Лацис Оруджев ва жавабдар маса ксарни рахана.