«Чи кар гьахълуди я, чун гъалибни жеда!»

ИкI, са шумуд йисан вилик гзаф уьлквейрин, гьабурукай яз Россиядин халкьарни коронавирусдин тIугъвалди гьелекна. Са йисалай виниз я гила Донбассда кьиле физвай женгинин гьерекатри инсанрин рикIер тIарзава.

РикIел хкин: РФ-дин Президентдин Указдалди Россиядин армияди 2022-йисан 24-февралдилай Украинада женгинин махсус серенжем тухузва. Президент Владимир Путина лагьанай: «Россиядин вилик акъвазнавай месэла чеб урус халкьдин ва культурадин пай я лугьузвайбурун тереф хуьн, абуруз даях хьун я».

И махсус серенжемда Сулейман-Стальский райондайни Россиядин армиядин офицерар, контрактникар ва мобилизациядик акатайбур яз 300-далай виниз инсанри иштиракзава, жуьрэтлувал, кьегьалвилер къалурзава. Ихьтинбурукай сад Герейханован хуьряй тир контрактник Ягъибеков Заур Наврузович я. Акунмазди рикIиз чими хьайи жегьилдихъ галаз зун и йикъара мукьувай таниш хьана. Чи арада кьиле фейи суьгьбет къе чна газетда гузва.

- Гьуьрметлу Заур Наврузович, сифтедай заз вуна чи газет кIелзавайбур ви уьмуьрдин рекьихъ галаз танишарна кIанзавай.

- Зун Герейханован хуьре 1998-йисан 21-январдиз дидедиз хьана. За инин 1-нумрадин юкьван школада 9-класс акьалтIарна, Ульяновск шегьердин физкультурадин техникумдик экечIна. Гуьгъуьнлай Дербентда ДОСААФ-дани кIелна. 2018-2019-йисара Крымда Черноморский флотда къуллугъна. Адалай гуьгъуьниз Ростовский областда армияда контрактдай къуллугъун давамарна.

- Украинада кьиле тухузвай женгинин серенжемда мусалай иштиракзава?

- Гьа сифте йикъалай. Зун младший сержант, медицинадин отделенидин командир я. Чи военный частуни алай вахтунда Донецкий областдин Маленка шегьердин патарив махсус серенжемда иштиракзава. Женг кьиле физвай майдандилай чна хирер хьанвай чи аскерар хатасуз чкадиз хкана. И арада чаз Украинадин патай гуьлле гана. Нетижада зал хер хьана, катдай вахт хьанач. 14 юкъуз зун Ростовдин, 14 юкъузни Анападин госпиталра хьана. Сагъар хъувур зун отпускдиз кIвализ ахъайна. 20-июлдиз махсус серенжемда иштиракиз жува къуллугъзавай частуниз хъфизвайди я.

- Ватандиз хтайла, райондин, хуьруьн гьакимри ви дерди-гьал хабар кьунани?

- Эхь, зун общественный хатасузвал хуьнин рекьяй райондин администрациядин Кьилин заместитель Абуталиб Бабаевич Фатулаева кьабулна, зи, гьакIни чи хизандин дерди-гьал, кIанзавай куьмек хабарар кьуна, захъ галаз яргъалди ихтилатар авуна, ватанпересвал къалурунай чухсагъул лагьана.

Захъ галаз Герейханован хуьруьн администрациядин кьил Руслан Алиевич Алдыровни гуьруьшмиш хьана, дерди-гьал хабар кьуна. Идай за абуруз чухсагъул лугьузва.

- СВО-да вуна женгинин гьерекатра гзаф сеферра иштиракнани?

- Завай «эхь» лагьана жаваб гуз жеда. Луганскдин терефда женгинин серенжемра гзаф хьана. Заз жувалай тариф ийиз кIандайди туш. ЯтIани за лугьуда: захъ женгера къалурай кьегьалвилерай ганвай «За боевое отличие» медаль ава. Кьвед лагьай награда гун патал зи документар зун отпускдиз хуькведалди гьазурнавай. Орден яни, медаль яни заз чидач, отпускдай хъфейла чир жеда.

- Донбассдин халкьди Россиядин контрактникар, мобилизациядик акатна СВО-диз фенвайбур гьикI кьабулзава?

- ЧIехи паюни лап хушдаказ. Гзафбуру «Наши спасатели» лугьуз, чи аскеррин гарданар кьада. Чи есирда гьатай Украинадин гзаф офицерри ва аскеррини чпиз Украинадиз хъфиз кIанзавач лугьузва. Медицинадин рекьяй сифте куьмек, тIуьн гузвай СВО-дин иштиракчийрилай абур рази я. Украинадиз хъфейтIа миллетчийри чеб яна рекьида лугьузва.

- Махсус серенжемда иштиракзавай чи аскеррикай, абурун садвиликай, фикир-хиялдикай вуч лугьуз жеда?

- Дяве я ман. Сифте йикъара кичIевални авай. Бубайрихъ са мисал ава «анжах ахмакьдиз гуьлледихъай кичIе туш» лугьудай. Дяведа фад вердиш жезва, кичIе жедай вахт амукьзавач. Чи аскеррихъ садвал, дуствал, инанмишвал ава. Абуру лугьузва хьи, чи кар гьахълуди я, гьавиляй чун гъалибни жеда. Зи фикирни гьам я.

- Заур Наврузович, Донбассда кьиле тухузвай женгинин махсус серенжем себеб яз, алай вахтунда гзаф диде-бубайри чпин гадаяр армиядин жергейриз ракъурзавач, гьар жуьре себебар жагъурзава. Гзаф жегьилриз чпизни армиядиз физ кIанзавач. Абуруз армиядиз тухвай жегьилар СВО-диз тухунин къурху ава. Гьакъикъат гьихьтинди я?

- Шаз ва алай йисан гатуз Россиядин Яракьлу Къуватрин жергейриз эвер гайи гьич са касдини женгинин махсус серенжемда иштиракзавайди туш. И кар закондалди къадагъа я. Эгер жегьилдиз СВО-да иштиракиз кIан хьайитIа, адавай и кар къуллугъдин I йисан вахт куьтягь хьайила, контракт кхьена, ийиз жеда.

- Эхирдай чаз вуна ви гележегдин планрикайни лагьанайтIа кIанзавай.

- Гележегдин планар ихьтинбур я: махсус серенжем куьтягь хьайила, кIвализ хтана, мехъер авун. КIани рушни ава. Ахпа зун высший военный училищедик экечIда.

- Вун ви мурадрив агакьрай, гьуьрметлу Заур!

Суьгьбет авурди ва шикил ягъайди Хазран Кьасумов я