Ихтибар хъувуна

Россиядин ЦИК-ди малумат гайивал, сечкияр са артух шулугъар авачиз, синихар квачиз кьиле фена. 2012-йисан президентвилин сечкийрив гекъигайла, и сеферда хейлин цIийивилер ишлемишна. Абурун макьсад сад тир: сечкияр вири халкьди иштиракдайбур, ачухбур, михьибур авун. И кар патал сечкийрин участокра, 20I2-йисан сечкий­рив гекъигайла, кьве сеферда гзаф КОИБ-ар кардик кутуна. Онлайн къайдада кIвалахун, сечкийрин участокра сес гузвай гьал къалурун патал 46 агъзур видеокамера ишлемиш­на. Ида сечкийрин 85 процент участокрал гуьзчивал ийидай мумкинвал гана.

Россиядин Федерациядин Президент хкязавай сечкийрал Общественный палатадин 164 агъзур гуьзчиди, къецепатан уьлквейрай атанвай 1500 гуьзчиди ва гьа икьван журналистри гуьзчивална. Къецепата яшамиш жезвай россиявийризни сес гудай мум­кинвал яратмишун патал 144 уьлкведа сечкидин участокар ачухна.

Россиядин ЦИК-ди малумат гайивал, сечкийрин виликамаз кьунвай нетижаяр ихьтинбур хьана: Владимир Путиназ — участокриз атай — 76,69 процент сечкичийри (56,5 млн. сечкичиди), Павел Грудининаз -11,77, Владимир Жириновскийдиз — 5,65, Ксения Собчаказ -1,68, Григорий Явлинскийдиз -1,04, Борис Титоваз — 0,76, Максим Сурайкиназ — 0,68 ва Сергей Бабуриназ — 0,65 процент сечкичийри сесер гана.

Гьа икI, Россиядин Федерациядин Президентвиле Владимир Путин хкягъ хъувуна. Ада ругуд йисуз уьлкведиз регьбервал гуда. Вичин терефдаррин, сечкичийрин, журналистрин вилик экъечIна тебрикар кьабулдайла В. Путина виридаз сагърай лагьана, Россиядин вилик зурба крар квайди, абур кьилиз акъудун патал зирингдаказ виликди фин лазим тирди, халкь патал зегьмет чIугвадайди къейдна.