Хуьрерин Советар арадал атуникай

Гьа вахтунда адаз Кьасумхуьруьн рабочийрин, лежберрин ва красноармейцийрин депутатрин совет лугьузвай, ам Куьре округдин Гуьнейский участокдин исполкомдик акатзавай.

1963-1964-йисара районда дагъдин хуьрер дуьзендиз куьчарзавай. Хуьруьн Совет чIехи хьана, адак терг авур Советрин хуьрерни кухтуна.

Алай вахтунда (1995-йисан делилралди) Кьасумхуьруьн Советдик 613 кас яшамиш жезвай КIахцугърин, 1132 кас яшамиш жезвай Сийидрин ва 11033 кас яшамиш жезвай Кьасумхуьр акатзава. Кьасумхуьруьн Советда вири 12778 кас яшамиш жезва, 4065 майишат ава.

Хуьруьн Советдин мулкунал «Касумкентский» совхоз, минеральный ятар, консервияр акъуддай, ниси хкуддай заводар ва маса карханаяр ала, 3 школа, музыкальный школа, спортдин школа, аялрин 3 бахча, райондин центральный больница ва маса социальный объектар ала.

Кьасумхуьруьн Совет мукьвал алай ракьун рекьивай 35 километрдин яргъа ава.

1993-йисан 1-ноябрдиз чкадин самоуправленидин органар цIийикIа туькIуьр хъувун себеб яз Кьасумхуьруьн халкьдин депутатрин советдин бинедал алаз Кьасумхуьруьн администрация тешкилна. (1993-йисан 22-октябрдиз кьабулай ДР-дин Верховный Советдин ва 1993-йисан 1-ноябрдиз кьабулай халкьдин депутатрин райсоветдин къарарар).

Агъа СтIалрин хуьруьн Совет. Агъа СтIалрин хуьруьн Совет, Агъа СтIалрин хуьруьн бинедал алаз, 1921-1925-йисара арадал атана, гуьгъуьнлай мад са хуьр – АгъастIалрин къазмаяр арадал атана. Хуьруьн Советдин сифте председатель Велиев Пирмет тир.

1965-йисуз хуьруьн мулкунал ЦицIигърин, 1979-йисуз Чантархуьруьн жемятар куьчарна, гьа хуьрера саки 85 майишат авай. Хуьруьн мулкунал, центральный усадьба Агъа СтIал яз, «Ашагастальский» совхоз, алакъадин кьве отделение (Агъа СтIалдал ва Агъа СтIалрин къазмайрал), юкьван кьве школа, медицинадин 2 амбулатория, туьквенар, аялрин бахча ала.

И кьве хуьруьн агьалияр емишар, техил гьасилунал, малдарвилел, хпехъанвилел, къелемчивилел машгъул я.

Агъа СтIалрин хуьруьн Совет райцентрадивай 3 километрдин, ракьун рекьивай 30 километрдин мензилда ава.

1993-йисан 1-ноябрдиз чкадин самоуправленидин органра цIийивилер тун себеб яз, Агъа СтIалрин хуьруьн халкьдин депутатрин советдин бинедал алаз Агъа СтIалрин хуьруьн администрация тешкилна.

Аламишедин хуьруьн Совет. Аламишедин хуьруьн Совет, 1921-йисуз Хутаргъар центр яз, Хутаргърин, Бигеррин, Кьианрин, Ивигрин, Чуьхверхуьруьн хуьрер кваз тешкилай Хутаргърин хуьруьн Советдин бинедаллаз, 1968-йисуз тешкилна. Адак дагъ патай куьч хьайи Хутаргърин, Ялцугърин, Бигеррин, ЦицIерин хуьрер квай. 1977-1978-йисара иниз Кьианрин жемятни куьч хьана.

Алай вахтунда (1995-йисан делилралди) хуьре 3000 кас яшамиш жезва, 650 кIвал ава. Агьалияр, асул гьисабдай, ципицIар, салан майваяр гьасилунал машгъул я.

Хуьруьн мулкунал «Аламишинский» совхоз, юкьван школа, врачебный амбулатория, Дербентдин «Дагюн» фабрикадин гамар храдай филиал, 4 туьквен, алакъадин отделение, Культурадин кIвал ала.

Аламишедин хуьруьн Совет райцентрадилай 27 километрдин, ракьун рекьивай 18 километрдин мензилда ава.

1993-йисан 1-ноябрдиз Аламишедин хуьруьн халкьдин депутатрин Советдин бинедаллаз Аламишедин хуьруьн администрация тешкилна.

Алкьвадрин хуьруьн Совет. Алкьвадрин хуьруьн Совет 1958-йисуз Векьелрин хуьруьн Советдин (адак Алкьвадар, Векьелар, Сардархуьр, Сийидар квай) бинедаллаз тешкилна. 1952-йисуз Векьелрин хуьруьн жемят Кьулан СтIалдал куьч хьана. 1972-йисалай Алкьвадар ва Сардархуьр Алкьвадрин, 1958-йисалай Сийидар Кьасумхуьруьн хуьрерин Советрик акатна.

Хуьруьн мулкунал «Алкадарский» совхоз, «Сардаркентский» колхоз, юкьван ва тамам тушир юкьван школаяр, фельдшервилинни акушервилин 2 пункт, 2 Культурадин кIвал, алакъадин отделение, туьквенар ала.

Алкьвадрин хуьруьн Советдин агьалияр багъманчивилел, майвачивилел ва малдарвилел машгъул я.

Алай вахтунда (1995-йисан делилралди) хуьруьн Советда 1500 кас яшамиш жезва, 413 кIвал ава.

Хуьруьн Совет райцентрадивай 7 километрдин, ракьун рекьивай 47 километрдин мензилда ава.

1993-йисан 1-ноябрдиз халкьдин депутатрин хуьруьн Советдин бинедаллаз Алкьвадрин хуьруьн администрация тешкилна.

Уллу Гъетягърин хуьруьн Совет. Уллу Гъетягърин хуьруьн халкьдин депутатрин Совет Уллу Гъетягърин, Сайтархуьруьн, Чантархуьруьн, Пиперхуьруьн бинедаллаз 1921-йисуз тешкилна.

1973-йисуз Уллу Гъетягърин хуьруьн Советдик терг авур Агъа Хъартасрин хуьруьн Советдик кваз хьайи Агъа Хъартасрин ва Вини Хъартасрин хуьрерни кутуна.

Алай вахтунда (1995-йисан делилралди) Уллу Гъетягърин хуьруьн Советдик Уллу Гъетягърин, Сайтархуьруьн, Агъа Хъартасрин, Вини Хъартасрин, Птидхуьр ва Татарханрин хуьрер акатзава.

Уллу Гъетягърин хуьруьн Совет Уллу Гъетягърин хуьре ава, ам райцентрадивай 10 километрдин ва ракьун рекьивай 40 километрдин мензилда ава. Агьалийрин кьадар 1470-далай виниз я, Советда 450 кIвал ава.

Советдик акатзавай хуьрерин агьалияр малдарвилел, техил, салан майваяр, бустандин няметар гьасилунал машгъул я.

ДР-дин Верховный Советди ва халкьдин депутатрин Сулейман-Стальский райсоветди акъудай (1993-йисан 22-октябрь ва 1993-йисан 1-ноябрь) къараррин бинедаллаз халкьдин депутатрин Уллу Гъетягърин Совет Уллу Гъетягърин хуьруьн администрациядиз элкъуьрна.

Ялцугърин хуьруьн Совет. Ялцугърин хуьруьн Совет 1930-йисуз тешкилна. Адак Ялцугърин, КIахцугърин, Макьарин ва ЦицIерин хуьрер акатзавай.

1966-йисуз чилер зурзуникди, ДАССР-дин Гьукуматдин къарардалди, Ялцугърин, Макьарин, ЦицIерин, Хутаргърин, Бигеррин, ХипитIрин ва маса хуьрер Аламишедиз, ЦIийи Макьарал ва маса хуьрериз куьч хьана. Гьа йисуз Ялцугърин хуьруьн Советни терг хьана, КIахцугъар Кьасумхуьруьн Советдик кутуна.

Ялцугърин хуьруьн Советдин мулкарал Етим Эминан (Ялцугърал), Фрунзедин (Макьарал) ва Дахадаеван (КIахцугъа) тIварарихъ галай колхозар кардик квай.

Чи къейд. Хуьрерин Советрин тарихдикай винидихъ гъанвай делилар ва рекъемар чна 1995-йисуз райадминистрациядин архивдин отделдин заведующий Роза Исламовади гьазурай справкайрай къачурбур я.

(кьатI ама)

Гьазурайди Хазран Кьасумов я.