Гьуьрметни ава, къиметни

Айишат Къурбаналиевна Кьасумова и чIехи гьуьрметдиз куь лайихлу авуна? Ам фадлай ва хъсандиз таниш тир чавай и суалдиз куьрелди жаваб гуз жеда: намуслу зегьметди.

Мадни, чи фи-кирдалди, А. Кьасу-мовадикай раха-дайла Инсан ва Муаллим гафар чIехи гьарфарилай кхьиниз лайихлу я.

А. Кьасумовадин рикI муаллимвилин пешедал гъвечIи чIавалай алай. Гьа-виляй вичин рикIе авай мурад кьилиз акъудун патал же-гьил руш, Алидхуьрел юкьван школа акьалтIарна, 1979-йисуз Дагъустандин государственный педагогический институтдин (ДГПИ-дин) филологиядин факультетдик экечIна. Институтдани Айишата, сифте курсунилай эгечIна, лап хъсан къиметар аваз кIелна, анин общественный уьмуьрда активвилелди иштиракна.

Жегьил пешекар А. Кьасумовади вичин зегьметдин рехъ 1984-йисуз Кьасумхуьруьн 1-нумрадин юкьван школада урус чIаланни литературадин тарсар гузвай муаллимвиле кIвалах авунилай башламишна.

1990-йисалай Айишат Къурбаналиевнади Кьасумхуьруьн 1-нумрадин юкьван школада 7 йисуз ада кIелзавайбуруз урус чIалан ва литературадин тарсар гана.

Школада кIвалахзавай сифте йикъарилай эгечIна А. Кьасумовади вич неинки дерин чирвилер авай, аялрал рикI алай, кIвалахдив яратмишдай тегьерда эгечIзавай муаллим, хъсан тешкилатчи яз къалурна. Гьа и ерийриз килигна школадин руководстводи ва муаллимри Айишат Къурбаналиевнадал еке ихтибар авуна: ам 1997-йисуз тербиядин рекьяй школадин директордин заместителвиле тайинарна. И кардин тереф райондин образованидин управленидин руководстводини хвена.

ЦIийи къуллугъди А. Кьасумовадин хиве еке ва жавабдар везифаярни туна: школада жуьреба-жуьре мярекатар, конкурсар тухун, школадин командаяр муниципальный ва республикадин конкурсриз ва маса мярекатриз гьазурун… Вири и везифаяр А. Кьасумовади намуслудаказ кьилизни акъудзава. Идан патахъай школадин КВН-дин командади, художественный самодеятельностдин коллективди, кьилдин кIелзавайбуру районда ва республикада тухузвай конкурсра, гьар жуьредин мярекатра кIвенкIвечи чкаяр кьуни ачухдиз шагьидвал ийизва.

Гьа са вахтунда, Айишат Къурбаналиевнади школадин, хуьруьн ва райондин общественный уьмуьрдани активвилелди иштиракзава. ИкI, А. Къ. Кьасумовади райондин дишегьлийрин Советдин председателвилин жавабдар везифаяр намуслудаказ кьиле тухуз пуд йис я. Райондин дишегьлийрин Совет Дагъустан Республикада хъсан тешкилатрин арада хьун – имни А. Кьасумовадин лайихлувал я.

Айишат Къурбаналиевнадин яргъал йисарин муаллимвилин, тешкилатчивилин ва общественный кIвалахар республикадин, Вирироссиядин гьукуматдин, общественный тешкилатрин, райондин образованидин управленидин ва школадин руководствойрин патай гзаф кьадар грамотаяр, Вирироссиядин агьалийрин перепись тухунин карда иштирак авунай махсус медаль гуналди къейднава.

Вичин вири савадлу уьмуьр, чирвилер ва алакьунар акьалтзавай несилдиз дерин чирвилер ва тербия гуниз бахшнавай, кIвалахда агалкьунар жезвай Айишат Къурбаналиевна Кьасумовадиз школадин муаллимрин, кIелзавайбурун ва абурун диде-бубайрин патай лайихлу гьуьрметни ава.

Асият Мирзалиева,

Хазран Кьасумов