Еридин суьрсет гьасилзава

Еридин гьафтедин ва Еридин йикъан вилик квай йикъара чун Сулейман-Стальский райондин хуьруьн майишатдин ва суьрсетдин управленидин начальникдин заместитель Гьамидин Абдулкъафаровахъ галаз гуьруьшмиш хьана, адахъ галаз Еридин йикъакай ва районда гьасилзавай, экологиядин жигьетдай михьи тир ва еридин продукциядикай ихтилатар авуна.

- И йикъара чи управленидиз Дагъустан Республикадин хуьруьн майишатдин ва суьрсетдин министрдин заместитель Э. Шайхгьасановалай хтай чарче, еридин суьрсет гьасилзавай карханайрин арада аваз чи райондин са шумуд карханадин тIварни кьунва, абуруз Еридин гьафте ва Еридин югъ мубаракзава, — лугьузва Гьамидин Абдулкъафарова. – Гьелбетда, им шадвал кутадай кар я. Гьакъикъатдани, райондин хейлин карханайри гьасилзавай суьрсетдихъ неинки районда, гьакIни республикада ва адалай яргъарани муьштерийрин патай еке игьтияж ава.

Гьамидин Абдулкъафарова чаз лагьайвал, тIебиатдин шартIариз, чилин менфятлувилиз килигайла, чи районда хъсан еридин, экологиядин жигьетдай михьи тир суьрсет гьасилдай вири жуьредин шартIар ава. Хъсан пешекарар, чилин къадир авай зегьметкеш инсанарни чахъ ава.

УСХП-дин начальникдин заместитель Гь. Абдулкъафарова чаз хъсан еридин, экологиядин жигьетдай михьи тир суьрсет гьасилзавай карханайрин тIварарни кьуна, тайин мисалар гъана. ИкI, «Манатилов М. М.» КФХ-да малдарвал вилик тухузва, хъсан еридин, экологиядин жигьетдай михьи тир нек, некIедин продукция, къатух, къаймах, шур, суьзме, чIем, бугъламишай як (тушенка) гьасилзава.

«Агабеков Ф. А.» КФХ-ди гьасилзавай дагъдин виртIедихъ, «ЧIахар» КФХ-ди гьасилзавай чIахардихъ, михьи авунвай нехуьхъни муьштерийрин патай еке игьтияж ава.

«Паласа» ООО-да интенсивный технологиядалди гьасилзавай «Голден Делишес», «Гренни Смит», «Гала», «Ред Чеф» ва «Фуджи» сортарин ичерив къведайбур Кьиблепатан Дагъустанда бажагьат ава. Еридизни, дадунизни, экологиядин жигьетдай михьивиляйни абур тафаватлу я.

«Дербент-Агро», «ЧIереяр», «Гюльгери-вацI», «Зардиян» ООО-ра гьасилзавай ципицIрин, Сабир Абакарован ИП-да гьасилзавай некьийрин, Агьмед Нуралиеван ИП-да туьретмишзавай осетровый жинсинин балугърин гьакъиндайни муьштерийри разивал ийизва. Абурухъни хъсан ери, экологиядин жигьетдай михьивал ава.

- Винидихъ тIвар кьунвай карханайрин зегьметчи коллективриз ва кьилдин ксариз Еридин гьафте ва Еридин югъ мубарак авуналди, заз абурухъ хъсан еридин ва экологиядин жигьетдай михьи суьрсет гьасилунин карда мадни еке агалкьунар хьана кIанзава, — лагьана чи суьгьбетдин эхирдай райондин хуьруьн майишатдин ва суьрсетдин управленидин начальникдин заместитель Гь. Абдулкъафарова.

Хазран Кьасумов

Шикилда: районда гьасилзавай еридин михьи суьрсет.