Меню
16+

Сетевое издание «Кюре»

11.11.2019 13:47 Понедельник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Гиппократан кьинез вафалуди

Сулейман-Стальский райондин 90 йисан юбилей къейд авунин сергьятра аваз гзаф йисарин гьакъисагъ зегьметдай Дагъустан Республикадин Гьукуматдин Председатель Артем Здунова ва Гьуку-матдин Председателдин заместитель Рамазан Жафарова са шумуд касдив гьукуматдин наградаяр вахкана. Абурун арада райондин центральный больницадин старший медсестра Маисат Балихановани ава. Награда вахкуналди, Артем Здунова ва Рамазан Жафарова медсестра М. Балихановадиз тебрикдин келимаяр ва кIвалахда мадни еке агалкьунар хьана кIанзавайди лагьана (шикилда).

Маисат Балиханова вичин пешедал рикI алай, масадан дердиникай хабар кьадай, ширин мез, ачух рикI авай медицинадин работник, инсан яз чаз фадлай хъсандиз таниш я.

М. Балиханова (Садыкьова) 1968-йисуз вичиз гьахълудаказ алимринни шаиррин макан лугьузвай Агъа-СтIалрин хуьре дидедиз хьана. Хуьруьн юкьван школада 8-класс лап хъсан къиметар аваз акьалтIарай жегьил руш, гъвечIи чIавалай вичин рикIе авай мурад кьилиз акъудун яз, Каспийск шегьердин медицинадин училищедик экечIна. 1985-йисуз «медицинская сестра» пешекарвал къачуналди училище акьалтIарай Маисат райондин центральный больницадиз кIвалахал хтана.

- Сифте яз райондин больницадиз атай югъ зи рикIел хъсандиз алама, — лугьузва Маисат Мегьамедгьадиевнади. – Зун больницадин кьилин духтур Мегьамедрасул Гьажиевич Аллагьвердиева хушвилелди кьабулна ва заз хирургический отделенида медсестравиле кIвалах авун теклифна. Гьа йикъалай къенин йикъалди жуван кьисмет ЦРБ-дин гьуьрметлу, дуствилин коллективдихъ галаз алакъалу авунал за шадвални ийизва.

М. Балихановади хирургический отделенида кIвалах авур са тIимил вахтунда хъсан чирвилер авай пешекар яз къалурна. И кар себеб яз больницадин руководстводи ам 1986-йисан сифте кьилера инфекционный отделенидиз медсестравилиз кIвалахал ракъурна. И кардихъни вичин себеб авай: эхиримжи йисара ина садакай-садак акатдай азаррикди начагъбурун кьадар гзаф тир, аялар кьиникьин дуьшуьшарни авачиз тушир. Мадни, цIуд йисаралди капитальный ремонт тавунвай инфекционный отделенида медработникриз кIвалахдай гьич са жуьрединни шартIар авачир. Гьавиляй отделенидиз пешедал рикI алай, хъсан чирвилер авай, кIвалах алакьдай пешекарар чарасуз герек тир. Инфекционный отделенидани Маисат Балихановади вичин хиве авай везифаяр намуслудаказ кьилиз акъудиз хьана. Ада къенин йикъалди и отделенида старший медсестра яз кIвалахзава, агьалийрин патай вичиз еке гьуьрмет ва кIанивал къазанмишнава.

- Маисат Мегьамедгьадиевнадикай рахадайла, завай лугьуз жеда хьи, ам вичи хкянавай пешедиз ва Гиппократан кьинез кIевелай вафалу кас – медсестра я, — лугьузва кIвалахдин саки 40 йисан тежриба авай духтур-инфекционист, Дагъустан Республикадин лайихлу духтур Саид Незирметович Саидова. – Чна санал инфекционный отделенида кIвалахиз 33 йис я. Отделенидин кIвалах хъсан, районда садакай-садак акатдай азаррин кьадар тIимил хьуник медсестра Маисатан еке пай ква.

Чаз райондин центральный больницадай лагьайвал, М. Балихановади неинки вичин кIвалахдин чкадал, гьакIни хуьрера садакай-садак акатдай ва маса хаталу азаррин вилик пад кьунин кардани активвилелди иштиракзава, халкьдин арада профилактикадиз талукь кIвалахни тухузва. ИкI, мисал яз, медсестра Маисата Курхуьрел, КIварчагъа, Кьулан СтIалдал руфунин тиф, «А»» гепатитдин азаррин вилик пад кьун патал тухвай серенжемра иштиракна.

Пешедин устад, тежрибалу медсестра яз М. Балихановади районда ва Махачкъалада тухвай медработникрин конференцийра, семинарра иштиракна, анра вичин кIвенкIвечи тежрибадикай суьгьбетар авуна, лекцияр кIелна. «Медицинадин лап хъсан медсестра», «Пешедай лап хъсанди» лишандик кваз тухвай конкурсрани Маисат Мегьамедгьадиевнади са шумудра приздин чкаяр кьуна.

Дурумлу ва намуслу зегьметдай М. Балихановадиз Дагъустан Республикадин здравоохраненидин министерстводин, райондин центральный больницадин кьилин духтурдин патайни са шумудра Гьуьрметдин грамотаяр гана, чухсагъулар малумарна.

Вичин пешедай руьгьдин таъминвал аквазвай М. Балихановадикай макъала кхьидайла, зи рикIел къадим девирдин медицинадин «шагь» Авиценна Ибн Синади лагьай гафарни хтана: «Духтурдихъ катран вилер, рушан гъилер, гъуьлягъдин акьул, асландин рикI хьана кIанда». И гафар Маисат Мегьамедгьадиевнадиз вири терефрихъай хас я лагьайтIа, бажагьат зун ягъалмиш жеда.

РикI алай пешеди хьиз, М. Балихановадиз гьуьрметлу, марифатлу хизандини руьгьдин таъминвал гузва. ИкI, райондин агьалийриз яшайишдин жигьетдай къуллугъзавай управленида кIвалахзавай уьмуьрдин юлдаш Ибадулагь Бедулагьовичахъ галаз Маисат Мегьамедгьадиевнади кьве велед хана, хвена, уьмуьрдин шегьредал акъудна. ИкI, руш Заира дидедин рекьеваз фена: Саратовдин медицинадин университет акьалтIарай ада Москва шегьерда участковый врач-терапевт яз кIвалахзава.

Пермь шегьердин высший военный институт акьалтIарай гада Заур алай вахтунда Иркутский областдин Ангарск шегьерда кьетIен метлеб авай полкуна автомобилрин взводдин командир я.

«Дагъустан Республикадин здраво-охраненидин лайихлу работник» гуьрметдин тIвар мубарак авунихъ галаз сад хьиз, чаз Маисат Балахиновадихъ мягькем сагъламвал, хизандин бахтлувал, четин, гьа са вахтунда гзаф гьуьрметлу кIвалахда мадни еке агалкьунар хьана кIанзава.

Текст кхьейди ва шикил ягъайди Хазран Кьасумов я

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

32