Дурумлу зегьметдай – лайихлу тIвар

Дурумлу ва яргъал йисарин зегьметдай адаз райондин 90 йисан юбилейдин мярекатдал «Дагъустан Рес-публикадин физический куль-турадин лайихлу работник» лагьай тIвар гана. Наградани адав Дагъустан Республикадин Гьукуматдин Председатель Артем Здунова ва адан за-меститель Рамазан Жафарова шад гьалара вахкана (шикилда).

Альберт Межидов гьеле КIварчагърин юкьван школада кIелзавай йисара зирек, викIегь, спортдал рикI алай жаван тир. Районда школьникрин арада тухвай акъажунрани ада са шумуд жуьредай кIвенкIвечи чкаяр кьунай. 1988-йисуз школа акьалтIарай Альберт Воронеж шегьердин технический учи-лищедик экечIна. Ина кIелдай, Ленинграддин областда арми-ядин жергейра къуллугъзавай йисара ва гуьгъуьнлай Воро-неждин медицинадин училищеда кIелдай йисара ам боксдал рикIивай машгъул хьана. Спортдин и жуьредай сифте вердишвилерни ада вичин стхаяр тир Нариманавай ва Шагь-эмиравай къачуна.

Воронежда кIелдай йисара А. Межидова 2 сеферда и шегьер-дин, 2 сеферда Воронеждин областдин, Чебоксар, Курск, Воронеж ва маса шегьерра тухвай Вирироссиядин турнирра чемпионвилин тIварар къачуна. РФ-дин спортдин мастервиле кандидат Альберта санлай къачурла рингда 77 женг тухвана, абурукай 69-да гъалибвал къазанмишна.

1999-йисуз хизандин гьалар себеб яз хуьруьз хтай А. Межидова боксдин секция (Герейханован ДЮСШ-дин филиал яз) ачухна, КIварчагъ дередин жаванриз боксдай вердишвилер гуз эгечIна.

2001-йисан сентябрдин вац-ралай Альберта Кьасумхуьруьн 1-нумрадин ДЮСШ-дин тренер-преподаватель яз КIварчагъа вичин рикI алай пешедай кIвалахун давамзава. Инал «кIвалахзава» гаф ишлемишун тIимилни яз аквазва, гьикI лагьайтIа, адан гъилик боксдай вердишвилер къачузвай гадайри республикадин, Вирироссиядин, международный турнирра агалкьунар къазанмишзава.

Тренер-преподавателди чаз лагьайвал, икьван чIавалди адан гъилик вердишвилер къачур ва устадвал хкажай гадайрикай 32-дакай Дагъустан Республикадин кIвенкIвечивал патал тухвай акъажунрин гъалибчиярни призерар, 21-дакай Вирирос-сиядин турниррин чемпионар, 5 касдикай Россиядин Кьиблепатан Федеральный округдин гъа-либчиярни призерар, 2 касдикай Россиядин кIвенкIвечивал патал кьиле фейи акъажунрин чем-пионар, 64-дакай Кьиблепатан Дагъустандин зональный акъажунрин гъалибчиярни призерар хьанва.

Шадвал кутадай мад са кар ава. Альберт Межидован гъилик боксдай вердишвилер къачур, чпин устадвал хкажай са шумуд касдикай боксдай ва спортдин маса жуьрейрай машгьур спортсменар-чемпионар хьанва. ИкI, мисал яз, Камал Межидов боксдай 3 сеферда Дагъустандин, Россиядин Кьиблепатан Фе-деральный округдин чемпион, РФ-дин кIвенкIвечивал патал тухвай акъажунрин гъалибчи, Россиядин спортдин мастер Рафик Наврузов междуна-родный турниррин чемпион, спортдин мастер Имран Абдиев панкратиондай дуьньядин Кубокдин сагьиб, Европадин, кьве сеферда Россиядин чем-пион, Агъарза Агъамегьамедов панкратиондай дуьньядин чемпион, Нуьдуьрмегьамед Алдербеков панкратиондай Россиядин чемпион, дуьнядин Кубокдин сагьиб я.

Алай вахтунда Альберт Межидован гъилик КIварчагъай, Экендилай, НуьцIуьгъай ва Зизикай тир 40 жаванди боксдай вердишвилер къачузва, чпин устадвал хкажзава. Абуруни районда, республикада ва адалай къеце тухузвай турнирра иштиракзава, агалкьунар къа-занмишзава.

- Алай йисан октябрдин вацра халкьдин кьегьал хва Имам Музамудинович Яралиеван хизандин такьатрихъ эцигай спортдин зурба комплекс КIварчагъа ачухна, гила ана жаванриз боксдал машгъул жедай вири жуьредин шартIар хьанва, — лугьузва Альберт Межидова. – Ида чи вилик мадни хъсандиз кIвалахунин, чIехи турнирра мадни еке агалкьунар къазанмишунин везифаяр эцигзава, и кар патал чна чалишмишвални ийида.

Меценат ва общественный деятель Имам Яралиеваз хьиз, Альберт Межидова ва жаван боксерри КIварчагъиз дередин амай хуьрерай жаван спорт-сменар гъиз-хутахдай машин чара авунай райондин Кьил Нариман Абдулмуталибоваз, гьар са карда куьмекар гунай 1-нумрадин ДЮСШ-дин директор Сергей Мирзалиеваз, райондин физкультурадин, спортдин, туризмдин ва жегьилрин крарай Комитетдин директор Надыр Эфендиевазни чухсагъул лугьузва.

Альберт Межидовакай рахадайла къейд ийиз кIанзава хьи, мукьвара ам боксдай Кьиблепатан Дагъустандин хкянавай командадин старший тренервилени хкянава.

Мадни, А. Межидовахъ къве-дай йисан февралдин вацра КIварчагъа цIийи спортком-плексда боксдай Кьиблепатан Дагъустандин кIвенкIвечивал патал турнир тухудай фикирна ава.

«Дагъустан Республикадин физический культурадин лайихлу работник» тIвар мубарак аву-налди, чаз Альберт Междовахъ тренервилин кIвалахда, адан ученикрихъ чемпионатрани турнирра мадни еке агалкьунар хьана кIанзава.

Текст кхьейди ва шикил ягъайди Хазран Кьасумов я