Меню
16+

Сетевое издание «Кюре»

21.11.2019 10:33 Четверг
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Идарайрин ва карханайрин тарих

Райондин образованидин отдел. 1920-йисуз районда халкьдин образованидин отдел тешкилна, адан сифте заведующий Ярагьмедов Абдулагь Абдурагьманович тир.

1993-йисан 5-мартдиз Сулейман-Стальский райондин администрациядин къарардалди райондин халкьдин образованидин отдел райондин образованидин управленидиз элкъуьрна.

1940-йисуз районда юкьван са школа (Касумкентская средняя общеобразовательная трудовая политехническая школа с производственным обучением), 6 ирид йисан, 45 сифтегьан школаяр, 1950-йисуз 4 юкьван, 19 тамам тушир юкьван, 26 сифтегьан школаяр кардик квай. 1950-йисуз школайра 4230 аялди кIелзавай.

1970-йисуз районда кардик кваз хьайи 10 юкьван, 19 тамам тушир ва 23 сифтегьан школайра кIелзавайбурун кьадар 13 500-далай виниз тир.

2005-йисуз районда 42 школа авай: 26 юкьван, 7 тамам тушир юкьван, 9 сифтегьан школаяр, гьакIни школадилай виликан 10 идара, аялринни жаванрин спортдин 2 школа, аялрин яратмишунрин кIвал, жегьилрин йифен школа кардик квай.

Райондин школайра (2005-йисан 1-январдин делилралди) 10675 аялди кIелзавай. РУО-да информациядинни методический центр, ХЭК ва централизованный бухгалтерия кардик квай.

2005-йисан 1-январдиз образованидин хиле 1550 муаллимди кIвалахзавай, абурукай 21-дахъ ДАССР-дин лайихлу муаллим, 1-дахъ РСФСР-дин лайихлу муаллим, 82-дахъ халкьдин образованидин отличник лагьай гьуьрметлу тIварар авай.

Райондин архивдин 50-фондуна райондин образованидин отделдин (управленидин) 1946-1988-йисарин 286 дело хуьзва, абур хъсан гьалда ава.

Кьасумхуьруьн лесхоз. Дагъустандин тамарин майишатдин управленидин Кьасумхуьруьн лесхоз, чкадин метлеб авай тамарин бинедаллаз, 1934-йисуз тешкилна, ада Агъул, Хив, Кьурагь, Кьасумхуьруьн, Рутул, Ахцегь ва Докъузпара административный районриз къуллугъзавай. Адаз Кьасумхуьруьн межрайлесхоз лугьузвай. 1935-йисуз Кьасумхуьруьн лесхоздикай Рутулрин лесхоз хкудна, Рутул, Ахцегь ва Докъузпара районрин чкадин метлеб авай тамарин бинедаллаз Рутулрин лесхоз тешкилна.

1936-йисуз Кьасумхуьруьн лесхоздиз Хиврин лесхоз лагьана тIвар гана. 1951-йисуз Ахцегьрин лесхоз тергна, адан тамар Хиврин лесхоздив вахкана.

1958-йисуз ДАССР-дин хуьруьн майишатдин министерстводин 153-нумрадин приказдин бинедаллаз Кьасумхуьруьн лесхоз тешкилна, адак Кьасумхуьруьн, Хиврин, Рутулрин, Самурдин ва Мегьарамдхуьруьн районрин лесничествояр акатзавай. 1963-йисалди адаз Кьасумхуьруьн мехлесхоз лугьузвай.

1963-йисалай Кьасумхуьруьн мехлесхоздик пуд лесничество: Кьасумхуьруьн, Хиврин ва Рутулрин лесничествояр кумукьна, адаз Кьасумхуьруьн лесхоз лугьузвай.

1993-йисалай гьар са лесничестводи чпин районрин сергьятра аваз кьилдин лесхозар тешкилна. Гьадалай инихъ Кьасумхуьруьн лесхозди чкадин метлеб авай тамариз къуллугъзава. Лесхоз РФ-дин ДР-да авай тIебиатдин ресурсрин ва чун элкъуьрна кьунвай алемдин Главный Управленидиз табий я.

Алай вахтунда (2007-йисан делилралди) лесхозда 52 касди кIвалахзава.

Райондин государственный архивда лесхоздин 1956-1993-йисарин 212 дело хуьзва.

Райондин хуьруьн майишатдин управление. Кьасумхуьруьн райондин производстводин колхозринни совхозрин управление 1962-йисуз хуьруьн майишатдин продукция гьазурунин ва маса гунин кьилин сельхозинспекциядин бинедаллаз тешкилна (УСХ-дин 1962-йисан 2-апрелдин 1-нумрадин приказ). 1965-йисан февралдилай 1969-йисалди адакай райондин производстводин хуьруьн майишатдин управление (РПУСХ), 1969-йисалай райондин хуьруьн майишатдин управление (УСХ) хьана.

1983-йисан январдиз УСХ райондин агпромышленный объединенидиз элкъуьрна. 1992-йисан апрелдиз ДАССР-дин хуьруьн майишатдин министерстводин 51-нумрадин приказдин бинедаллаз и объединение райондин хуьруьн майишатдин управленидиз элкъуьрна.

Райондин хуьруьн майишатдин управленидик (2004-йисан 28-июлдин делилралди) акатзава: муниципальный унитарный хуьруьн майишатдин 6 кархана, государственный унитарный 1 кархана, 2 акционервилин общество, хуьруьн майишатдин производстводин 11 коллектив, 2 колхоз.

Райондин государственный архивда хуьруьн майишатдин управленидин 1939-1988-йисарин 271 дело хуьзва.

Райондин финотдел. Куьре округдин Кьасумхуьруьн райондин финансовыый отдел 1921-йисуз ДАССР-дин Конституциядин бинедаллаз окружной финотдел хьиз ачухна., 1929-йисуз ЦИК-дин «О ликвидации округов и административном делении ДАССР на районы»» постановление бинедиз къачуна, районрин финотделар, гьабурукай яз Кьасумхуьруьн райондин финансовый отдел тешкилна.

Кьасумхуьруьн райондиз Сулейман-Стальский район лагьана тIвар гунихъ галаз алакъалу яз, 1969-йисалай инихъ финотделдиз Сулейман-Стальский райондин финотдел лугьузва.

Кьасумхуьруьн райфинотдел Дагъустандин Наркомфиндиз ва Кьасумхуьруьн райисполкомдиз табий тир, алай вахтунда ам ДР-дин финансовый министерстводиз ва Сулемйан-Стальский райадминистрациядиз табий я.

Райфинотделдин къурулушдик бюджетдин отдел, бухгалтервилин учетдин ва гьахъ-гьисабдин отдел акатзава. 1990-йисалди райфинотделда налогрин инспекция кардик квай, 1990-йисалай инспекция финотделдивай чара хьана. Кьилдин организация арадал атана.

Сулейман-Стальский райфинотдел Кьасумхуьрел административный дараматда (Ленинан куьчеда) ава.

Гьазурайди – Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5