Страницы истории районной газеты «Кюринские известия»

1945-йисан январдин вацра «Колхоздин пайдах» газетдиз акъатай макъалаяр

1. «Кьасумхуьр. Дагъустан АССР.

Ялцугърин Етим Эминан тIварунихъ галай колхоздин сифтегьан парткомитетдин секретарь юл. Алимирзоеваз, KIaxцугърин Дахадаеван тIварунихъ галай колхоздин председатель юл. Гуьлметоваз.

Фронтовикрин хизанриз куьмекдин фондуниз 15000 манат пул, малар, хуьруьн майишатдин продуктар ва шейэр кIватIай Етим Эминан ва Дахадаеван тIварунихь галай колхозрин колхозчи итимриз ва дишегьлийриз зи стхавилин салам ва Красная Армиядин патай чухсагъул лагь.

И.СТАЛИН».

2. «Кьасумхуьр, Дагъустан АССР.

КIварчагърин «Коммуна» тIвар алай колхоздин сифтегьан комсомолдин тешкилатдин секретарь юл. Байрамбеговаз.

Дяведин къуллугъчийрин хизанрин гьакъиндай къайгъу чIугунай вуна, юлдаш Байранбегов, зи салам ва Красная Армиядин патай чухсагъул кьабула.

И.СТАЛИН».

3. Абдулагъадин куьмек.

Агъа СтIалрин Сулейман-Стальскийдин тIварунихъ галай колхоздин бухгалтер Шагьмирзоев Абдулагъади фронтовикрин хизанриз куьмекдин фондуниз кьилди вичин патай 230 килограмм техил, 2000 манат пул, са жунгав гана ва ада 2 фронтовикдин аялриз парталар гьазурна. И кардин гьакъиндай ада чIехи Сталиналай телеграмма къачуна.

Райондин «Колхоздин пайдах» газетдин фондунай чаз агъадихъ галай телеграммани жагъана.

Москва. Кремль. Играми Иосиф Виссарионович СТАЛИНАЗ.

Красная Армиядин яракьлу къуватар артухаруниз куьмек яз за, ДАССР-дин Кьасумхуьруьн райондин Хтунрин хуьруьн Долоресан тIварунихъ галай колхоздин председатель Сулейманов Мигьралиди, зи патай 10000 манат ганва.

Къуй и за гузвай са тIимил пул чи пак тир чил немсерин бандитрикай азад авунин карда Красная Армиядиз куьмек хьурай.

Мигьрали СУЛЕЙМАНОВ, 1944-йис, мартдин варз.

Са тIимил йикъарилай М. Сулейманова И.Сталиналай чухсагъул лугьузвай телеграмма къачунай.

Диде-бубайрихъ галаз школадин алакъа хъсан жезва

И йикъара Татарханрин муьжуьд йисан школадин завуч юл. С. Наврузова, и школадиз Птид хуьряй кIелиз къвезвай аялрин диде-бубайрин собранидал «Школа ва хизан» темадай доклад авуна.

Юл. Наврузова диде-бубаяр аялриз хизанда гана кIанзавай тербиядин, школада зегьметдин тарсарихъ авай метлебдин гъавурда туна. Абуруз чпин аялри школада гьикI кIелзаватIа, алай кIелунин йисан зур паюнин итогар гьихьтинбур ятIа ва тарсарай хъсан къиметар къачун патал вуч лазим ятIа лагьана.

Собранидал экъечIна рахай Б. Эмиргьамзаева, А. Ярагьмедова ва З. Мегьамедкеримова юлдашри чпин аялрин кIелунни тербиядин кIвалахар хъсан хьун патал чпини еке къайгъударвал авун лазим тирди къейдна.

А. Мирзебалаев, «Колхоздин пайдах» №17, 1962-йис. 24-февраль.