Меню
16+

Сетевое издание «Кюре»

23.12.2019 11:24 Понедельник
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Шад гьалара къейдна

13-декабрдиз ЦIийи Макьарал и хуьруьн Культурадин кIвалин художественный руководитель, машгьур манидар ва музыкант, жуьреба-жуьре са шумуд фестивалринни конкурсрин лауреат Камилов Керим Камиловичан 70 йисан юбилейдиз талукьарнавай шадвилин чIехи мярекат кьиле фена.

И хуьруьн юкьвал алай банкетрин залда кьиле тухвай межлисда иштиракиз «Сулейман-Стальский район» муниципальный райондин Кьилин советник и хуьруьнви Агьмедов Мусаиб, райондин культурадин отделдин, Культурадин дворецдин жавабдар къуллугъчияр ва работникар, кIвалахдин юлдашар, дустар, машгьур манидарар, юбилярдин багърияр ва хуьруьнвияр атанвай. Абуру, юбиляр теб рик авуналди, гьар няметривди безетмишнавай столрихъ чкаяр кьурдалай гуьгъуьниз музыкантри анаг музыкадин ва манийрин ширин сесеривди ацIурна.

Микрофондихъ и хуьруьн Культурадин кIвалин директор Нурали Велибегов атана. Межлисдиз атанвайбур тебрик авурдалай гуьгъуьниз ада Керим Камилован уьмуьрдин рекьикай, хъсан музыкант ва манидар яз адан бажарагъдикай, агалкьунрикай, вичин дурумлу зегьметдалди, инсанвилин хуш къилихралди халкьарин арада къазанмишнавай еке гьуьрметдикай лагьана.

Керим Камилован иштираквални аваз «Кьасумхуьруьн далдамчияр» ансамблди тамамарай «Дагъларин везинар» вирибуру гурлу капар ягъуналди къаршиламишна.

Микрофон межлис кьиле тухузвайди тир машгьур тамада ДР-дин культурадин лайихлу работник Ярагьмед Ярагьмедова кьуна. Юбиляр ва межлисдин иштиракчияр тебрик авурдалай гуьгъуьниз ада гаф райадминистрациядин Кьилин советник Агьмедов Мусаиб Гьажибалаевичаз гана. Тебрикдин гафарилай гуьгъуьниз анал райондин Кьил Нариман Шамсудинович Абдулмуталибован Чухсагъулдин чар кIелна.

Юбилейдин тебрикдин гафар, Гьуьрметдин грамотаяр ва пишкешар гваз анал райондин культурадин отделдин къуллугъчияр и хуьруьнвияр тир отставкада авай полковник Магьсуд Магьмудов, шаирар тир Шагьабудин Шабатов, Мирземет Салманов, гьакIни райондин яратмишунардай интеллигенциядин, «Куьредин ярар» культурадин центрадин комитетдин тIварунихъай ЛПС-дин райондин отделенидин председатель Абидин Камилов рахана

Абуру юбилярдиз бахшна кхьенвай чпин шиирар кIелна. Эхиримжида адаз и центрадин Гьуьрметдин грамота ва гьакIни чи алай йисан юбиляр тир шаир Мислимат Агьмедпашаевадин бахш шиирар авай цIийиз акъатнавай «Чи дередин кьегьалар я» ктаб, пулунин гъвечIи пишкеш гана.

Анал Москвада ва гьакIни Санкт-Петербургда яшамиш жезвай чи ватанэгьлийрилай юбилярдин тIварцIихъ хтанвай телеграммаярни кIелна.

Межлис, тебрикдин гафар рахуналди, рикIе гьатдай гуьзел манияр лугьуналди ва кьуьлер авуналди Дагъустандин лайихлу артистар тир Омар Меликова, Даниял Къазиева, Дагъустандин искусствойрин лайихлу деятель Рустам Къарибова, гьевескар манидарар — Гуьльмира Алиевади, Мерзият Амахановади, кларнетчи – устад Женнет Римиева ва масабуру мадни гурлу авуна. Анал манидарри тамамарай юбилярди чи шаиррин чIалариз теснифнавай гуьзел манияр еке хушвилелди кьабулна.

Эхирдай юбилярди вичин гьуьрметдай атана межлисда иштирак авур вири юлдашриз еке чухсагъул лагьана.

Мизамудин Магьмудов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

9