КIвалахдал, аялрал рикI хьайила

Наградани адав Дагъустан Республикадин Гьукуматдин Председатель Артем Здунова ва адан заместитель Рамазан Жафарова вахкана (шикилда), тебрикдин келимаяр ва кIвалахда мадни еке агалкьунар хьана кIанзавайди лагьана.

… Пешеяр гзаф ава. Гьи пеше хъсанди я, гьидакай обществодиз гзаф хийир ава? Са гафуналди жаваб гуз хьун мумкин туш. «… Гзаф гудай за ватандиз хийир, Гъилер-фяле, рикI – кIвалах хьанайтIа» — кхьенай Лезги Нямета.

Обществодиз хийир авай пешейрикай яз муаллимвилин пешедин тIвар кьуртIа, бажагьат зун ягъалмиш жеда. XIX асирда яшамиш хьайи Италиядин писатель Джованни Руффиниди лагьанай:: «Муаллим, вич куз, масадаз ишигъ гузвай шем я».

И макъалада вичикай ихтилат физвай Керим Къадировичани муаллимвилин пеше хкягъунал, и рекье яргъал йисара кIвалахдай мумкинвал хьунал дамахзава.

К. Бабаева 1970-йисуз хуьруьн юкьван школа, гуьгъуьнлай Махачкъалада физкультурадин муаллимар гьазурдай курсар акьалтIарна, кьве йисуз ДаркIуш Къазмайрин юкьван школада физкультурадин тарсар гузвай муаллимвиле кIвалахна.

1974-йисалай къенин йикъалди К. Бабаева Кьулан СтIалрин юкьван школада вичин рикI алай пешедай кIвалахун давамзава.

Гьа са вахтунда, Керим Къадировича 1981-йисуз Л. Толстоян тIварунихъ галай Чечено-Ингушетиядин государственный университетни акьалтIарна.

Акьалтзавай несилдиз физический культурадин рекьяй чирвилер гунихъ, кьилдин кIелзавайбур ва школадин командаяр районда тухузвай школьникрин спартакиадайриз, жуьреба-жуьре турнирриз гьазурунихъ галаз санал, К. Бабаева школадин общественный уьмуьрдани активвилелди иштиракиз хьана. ИкI, саки 10 йисуз ада школада кардик кутур ученический производственный бригададиз регьбервал гана. И бригада неинки районда, санлай республикада кIвенкIвечийрин жергеда авай. Мисал яз, 1986-йисуз бригадади, 4 гектардай 430 тонн чугъундурар кIватI хъувуналди, республикадин ученический бригадайрин арада 1-чка кьунай. И агалкьунай К. Бабаеваз ВЛКСМ-дин ЦК-дин значок, бригададиз 1-дережадин диплом ганай.

Керим Къадировича гьазурай школьникрин командайри са шумуд йисуз райондин школьникрин спартакиадайра ва маса турнирра кьезил атлетикадай, мини-футболдай 1-чкаяр кьуна. Идалайни гъейри, К. Бабаеван регьбервилик кваз Избербашда, Каспийскда, Махачкъалада кьиле фейи «Спартакиада допризывной молодежи», «Орленок», «Президентские соревнования» акъажунра иштиракай командайри ва кьилдин спортсменри 1-3-приздин чкаяр кьуна.

Эхиримжи йисара республикадин школьникрин арада (яшарин пуд группада) тухузвай акъажунрани Керим Къадировичан тербиячийри алакьунар къалурзава, Дагъустан Республикадин кIвенкIвечивал паталд тухвай акъажунра чи командайри волейболдай 2-чка, многоборьедайни стритболдай 3-чкаяр кьуна.

К. Бабаеван гъилик вердишвилер ва устадвал къачур кьилдин гадайрихъни рушарихъ райондин ва республикадин турниррани акъажунра мадни хъсан нетижаяр жезва.

- Районда физический культурадин рекьяй виридалайни хъсан муаллим тир Керим Къадировича чи школада кIвалахунал чна гьахълудаказ дамахзава, — лугьузва школадин директор Ифриз Бабаевади. – Ам вичин кIвалахдив кьетIен жуьреда, рикI гваз эгечIзава. Гьавиляй ада гьазурзавай школьникрин командайрихъ ва кьилдин спортсменрихъ неинки районда, гьакIни республикада хъсан нетижаяр жезва, са шумуд йис я чи школадин командади райондин школьникрин спартакиадайра гъалибвал къачуз. Гаф авач, пешедин устад я Керим муаллим.

Гьа са вахтунда, К. Бабаева вичини, яшариз ва асул кIвалахдиз серфзавай вахтунизни килиг тавуна, спортдин акъажунрани иштиракзава. ИкI, ам 2017-йисуз Махачкъалада ГТО-дин нормаяр вахкунай тухвай Дагъустан Республикадин чемпионатда вичин яшарин спортсменрин арада гъалиб хьана. Идалайни гъейри, Керим муаллимди республикадин ва зональный акъажунра судьявилин везифаярни тамамарзава.

К. Къ. Бабаеван яргъал йисарин намуслу зегьмет, Дагъустан Республикадин лайихлу муаллим тIварцIелай гъейри, РСФСР-дин просвещенидин отличник (1986-йис), «РФ-дин умуми образованидин гьуьрметлу работник» (2010-йис) тIварар, «Зегьметдин ветеран» медаль (2001-йис), РФ-дин Президентдин Грант (2009-йис), ДР-дин образованидин ва илимдин министерстводин, райондин образованидин управленидин, школадин дирекциядин патай гзаф кьадар Гьуьрметдин грамотаяр гуналди къейднава.

КIвалахдал, аялрал рикI хьунал хьиз, Керим Бабаеваз чIехи ва гьуьрметлу хизандини руьгьдин таъминвал гузва. ИкI, адан уьмуьрдин юлдаш Имара Абдулбариевна 45 йисан къене биологиядин тарсар гузвай муаллим, РФ-дин умуми образованидин гьуьрметлу работник я.

Абурун веледар тир Миленади Вини СтIалрин юкьван школада урус чIаланни литературадин муаллимвиле, Лейлади райондин центральный больницадин поликлиникада акушервиле, Дианади ЦРБ-да бухгалтервиле кIвалахзава.

Дагъустан Республикадин лайихлу муаллимвилин тIвар мубарак авуналди, чаз Керим Къадирович Бабаевахъ гзаф четин, гьа са вахтунда гьуьрметлу муаллимвилин кIвалахда мадни еке агалкьунар хьана кIанзава.

Текст кхьейди ва шикил ягъайди Хазран Кьасумов я.