Магьсулдарвал вилик тухузва

- Хуьруьн майишатдин карханаяр патал хьиз, алайди магьсулдарар патални кIвалахдин къизгъин вахтни я, — лугьузва Сулейман-Стальский райондин хуьруьн майишатдин ва суьрсетдин управленидин начальникдин заместитель Гьамидин Абдулкъафарова. – ГьикI лагьайтIа, абуру къведай йисан бегьердин бине къемаз кутазва эхир. И жигьетдай магьсулдарвилел машгъул тир хуьруьн майишатдин карханайрин, лежбервилинни фермервилин майишатрин, арендаторрин кIвалах тариф авуниз лайихлу я.

Гьамидин Абдулкъафарова чаз лагьайвал, алай йисуз райондин хуьруьн майишатдин карханайри ва арендаторри 2361 гектардин майданрай 533 тонн нехв, 90 тонн гатфарин мух, 242 тонн зулун мух ва 4747 тонн зулун къуьл, санлай 5612 тонн техил кIватI хъувуна. Гьар са гектардай вахчур техилди 23,8 центнер тешкилзава. ТIебиатдин шартIариз килигайла, им пис нетижа я лугьуз жедач.

Къведай йисан бегьер патал районда 2020 гектарда (600 гектарда хуьруьн майишатдин карханайри ва 1420 гектарда арендадин участокра) зулун магьсулрин тумар цун планламишнавай. И кар патал августдин вацра ва сентябрдин вацран сифте паюна бес кьадар чил ва цадай тумар гьазурна. Тумар чилик кутунивни вахтундамаз эгечIна.

И кардал «Кюре–Агро» МТС ООО-дин ва кьилдин ксарин тракторар, сеялкаяр желбна. 15-ноябрдалди райондин хуьруьн майишатдин карханайра, арендаторрин участокра зулун магьсулрин тумар цана акьалтIарна. И кIвалах еридивди кьиле тухвай ва гзаф майданра зулун магьсулрин тумар цанвай карханайрикайни лежбервилинни фермервилин майишатрикай яз «Сайтар», «Горец», «Зардиян», «Сигма», «Новый путь», «Шах-Абузар» ООО-рин, «Гьайвазов Р. М.», «Казиахмедов А. К.», «Яхияев Н. М.», «Гамидов Назир» КФХ-рин тIварар кьаз жеда. Карханайрин зегьметчийри ва арендаторри магьсулрин никIерихъ иесивилелди гелкъуьн тешкилнава.

И йикъара райондин хуьруьн майишатдин ва суьрсетдин управленидин пешекарар магьсулар цанвай карханайриз ва арендадин участокриз фена, никIерин гьалар ахтармишна. Малум хьайивал, никIер мал-лапагдивай хуьн патал кIевирнава.

Санлай къачурла, никIер хъсан гьалда ава.

Гьа са вахтунда, райондин карханайри ва КФХ-ри 300 гектарда гатфарин магьсуларни цада. Бес кьадар чил къемаз гьазурнава.

- Лугьуз жеда хьи, хуьруьн майишатдин амай хилер хьиз, эхиримжи йисара районда магьсулдарвални вилик физва, — лугьузва Гьамидин Абдулкъафарова. – ИкI, мукьвал тир йисара районда техилар цадай майданар 2500-2600 гектардив агакьарда.

Хазран Кьасумов