Ватанпересвал къалуруналди

Санлай къачурла, райондай 3930 касди женгера иштиракна. Абурукай 1832 касдиз элкъвена хтун кьисмет хьанач.

Хуьрера, колхозра кьиле фейи собранийрал, митинграл агъсакъалрини жегьилри, итимрини дишегьлийри, коммунистри ва комсомолри душмандихъ галаз викIегьдаказ женг чIугвада, недай-хъвадай продуктралди, чими ва герек маса шейэралди армиядиз куьмек гуда, далу пата гьакъисагъвилелди зегьмет чIугвада лагьана хиве кьуна.

Гзаф районэгьлийри армиядин ва женгинин къудратлувал таъминарун патал дяведин цIийи техника гьазурдай пуларни гуьгьуьллудаказ кIватIна. ИкI, «Дагъустандин колхозник» тIвар алай танкарин колонна патал «Коммуна» колхоздин колхозчийри 20000, «Победа» колхозди 25600, «Октябрдин 25 йис» колхозди 19000, Асалдхуьруьн «Дагъустандин правда» колхозди 8000, Татархандхуьруьн колхозди 26562, Агъа СтIалрин хуьруьн Советдин совещанидин векилри (20 кас) 4560 манат, санлай райондин колхозри ва абурун председателри 362 агъзур манат пул кIватIна.

Идалайни гъейри, райондин агьалийри, идарайрин работникри Советрин Союздин Игит Мегьамед Гьажиеван тIварунихъ галай бронемашин туькIуьрун патал 57962 манат, Шамилан тIварунихъ галай танкарин колоннадиз 884887 манат, «Дагъустандин пионер» тIвар алай дяведин самолет туькIуьрун патал 56727 манат (и пул, асул гьисабдай, пионерри ва школьникри гана), Советрин Союздин Игит Валентин Эмирован тIварунихъ галай авиаэскадрильядин фондуниз 2112798 манат гана.

Райондин агьалийри фронт патал cap, хамар, кавалар, агъзурралди сун гуьлуьтар, бегьлеяр ва маса шейэрни ракъурна. ИкI, фронтда авай аскерар патал чими шейэр кIватIзавайдакай радиодай хабар гайила Агъа СтIалрин хуьруьн Советдиз сифтени-сифте Дагъус­тандин халкьдин шаир СтIал Сулейманан юлдаш Айна, хва Мирзеюсуф атана. Абуру гъана оборонадин фондуниз 4 кг. cap, 5 жигет, литинин чекмеяр, 2 жуьт кIаникай алукIдай парталар, шинель, сун перем, фуфайка ва маса шейэр вугана.

1943-йисан гатфариз фашистрин чапхунчийрикай азад хъувунвай колхозриз гун патал республикадин рабочий классди ва колхозчи лежберри пландилай алава яз 1000 гектарда магьсулар цун кьетIнай. И кампаниядик райондин карханаяр, кьилдин механизаторарни экечIнай. ИкI, Кьасумхуьруьн консервиярдай заводдин ва МТС-дин механизаторри са шумуд йикъан къене 150 гектарда чил къарагъарна гьазурна. МТС-дин механизатор А.Устаева вичиз ганвай асул тапшуругъ тамамарайдалай гуьгъуьниз азад хъувунвай чкайрин колхозар патал гьар юкъуз 1,5-2 гектар чил къарагъариз хьанай...

Райондин архивдин зеведиш А. С. Самедовадивай къачунвай и делилрай аквазвайвал, Ватандин ЧIехи дяведа гъалибвал къазанмишуник, советрин вири халкьари хьиз, чи райондин агьалийрини еке пай кутуна.

А. Мусаева.