СтIал Сулейманан парк-цIийи къаматда

Ам «Формирование современной городской среды в муниципальном районе «Сулейман-Стальский район» Республики Дагестан на 2018-2022 гг.» кар алай

программадай «Благоустройство общественной территории в с. Касумкент» проект уьмуьрдиз кечирмишун яз кьиле тухвана.

Комплекснидаказ тадаракламишнавай территориядик СтIал Сулейманан памятникдин бюст, 200 квадратный метрдин майдан кьунвай ва аялар къугъвадай 10 тадарак эцигнавай аялрин майдан, экв гудай 34 прибор, 15 скамейка, 15 урна, хъвадай цин булах эцигнавай майдан акатзава. Санлай къачурла, паркуни-бахчади саки 3000 квадратный метрдин майдан кьунва. Идакай 1100 квадратный метр гъвечIи майданар ва инсанар къекъведай (тротуардин плитка тунвай) рекьер я.

Парк-бахчадин территориядиз, анаг къайдадиз гъун ва дуьзмишун патал, 504 кубический метрдив агакьна бегьерлу накьв гъана, жуьреба-жуьре жинсинин 50 къелем, гьамиша къацуз амукьдай кул-кус гъана.

- Парк-бахча «Комфортная городская среда» программадай райондин 90 йис, СтIал Сулейманан 150 йис тамам жезвай йисуз цIийикIа туькIуьр хъувурдалай гуьгъуьниз ачух хъувун – им важиблу, шадвал кутадай вакъиа хьана, — лагьана чаз райондин Кьил Нариман Шамсудинович Абдулмуталибова. – Чи Дагъустан Республикадин Кьилин программадай районда ачухай кьуд лагьай объект я.

Гьакъикъатдани, алай вахтунда цIийикIа туькIуьр хъувунвай СтIал Сулейманан парк-бахча неинки Кьасумхуьрел, гьакIни районда гуьрчег, къулай, дуьзмиш чкадиз – имаратдиз элкъвенва.

Текст кхьейди ва шикил ягъайди Хазран Кьасумов я.