Ада вичин гел туна

Дугъриданни, ам районда, хуьре, кIвале гьуьрметлу кас тир. Ш. Гь. Гьажибабаев 1916-йисуз кесиб лежбер хизанда дидедиз хьана. 1932-йисуз ада ирид йисан школа куьтягьна ва ам Дагъустандин педагогвилин рабфакдиз гьахьна, 1936-йисуз анаг куьтягьна, муаллимвилин пеше къачуна Инал ам рази хьана акъвазнач, чирвилерихъ къаних, зигьин авай жегьилди кIелунар давамарун кьетIна. Гьа и йисуз ам Дагъустандин педагогвилин институтдин физикадинни математикадин факультетдиз гьахьна.

1940-йисуз институт хъсан къиметралди куьтягьай жегьил гада Дагъустандин Огни поселокдин са школадиз муаллим яз рекье туна. Амма школада адаз яргъалди кIвалахдай мумкинвал хьанач.

Ватандин ЧIехи дяве башламиш хьана. Гьажибабаев Шихбала гуьгьуьллудаказ хуьруьн са жерге жегьилрихъ галаз I94I-йисан гатуз дяведиз фена

Кьилин образование авай жегьил аскер военный частунин командованиди 6 вацран политрукар гьазурдай курсариз рекье туна. 1941-йисан декабрдиз ада и курсар куьтягьна. Адаз лейтенантвилин чин гана. Им Москвадин кIаник къати женгер физвай вахт тир. Жегьил офицердал ротадин политруквал ихтибарна. Москвадин кIаник хьайи женгер адан сифтегьан дяведин женгер тир. И женгера викIегьвиледи иштирак авунай Ш. Гьажибабаев капитанвилин чин гуниз лайихлу хьана, адал батальондин комиссарвал ихтибарна.

1941-йисан декабрдиз, 1942-йисан январдиз Москвадин патарив хьайи къати ягъунрин нетижада немсер Москвадилай са шумуд километр кьулухъ гадарнай. Москва немсерин къурхулувиликай хкатна.

Вичин сифтегьан женгера хьайи агалкьунар, викIегьвилер гьисаба кьуна, ам стрелковый дивизиядин штабдин начальникдин заместителвиле тайинарна.

Гьажибабаев Шихбала Гьажиба-баевича вичел гьи кIвалах тапшур-мишайтIани, бажарагълувилелди кьилиз акъудиз хьана. Ахпа ада 1-Украинадин фронтдин 247-стрелковый дивизияда къуллугъ авуна. Дяведин эхирдай ам 4-Украинадин фронтдани хьана. И фрон­тдин сад лагьай полкунин командирдин заместитель яз ада Чехословакиядин меркез Прага шегьер ва Карпатар азад авун патал фейи къати женгерани иштиракна. И женгера адал залан хер­ни хьана. Къалурай кьегьалвилерай адаз майорвилин чин гана.

ЧIехи Гъалибвилин югъ Ш. Гьажиба-баева Прага шегьердин са госпиталда къаршиламишна. Хер сагъ хьайидалай кьулухъ гвардиядин майор Гьа­жибабаев Шихбалади 70-гвардиядин дивизияда къуллугъ авун давамарна.

1945-йисан ноябрдиз ам хайи хуьруьз хтана. Дяведин женгера къалурай кьегьалвилерай Шихбала Гьажибаба­евич Ватандин дяведин 1 ва 2 лагьай дережайрин орденриз, «Прага азад аву­най», «Карпатар азад авунай», «1941-1945 йисарин Ватандин ЧIехи дяведа Германиядал гъалибвал къазанмишунай» ва са шумуд юбилейдин медалриз, главнокомандующийдин патай чухса-гъулдин чарариз лайихлу хьана.

Дяве куьтягь хьана. Са тIимил вахтундилай Ш. Гь. Гьажибабаеваз Дагъустандин партиядин обкомдиз эвер гана ва дяведа лигим хьанвай жегьил политработникдал ислягь девирда лекторвилин везифаяр ихтибарзава. Ибур дяведилай гуьгъуьнин четин йисар тир. Ам а вахтунда тефей хуьр, район Дагъустанда бажагьат ама.

Ш. Гьажибабаева 1947-йисалай 1949-йисалди Кьасумхуьруьн райкомдин кьвед лагьай секретарвиле, 1949-йисалай 1951-йисалди Мегьарамдхуьруьн партиядин райкомдин сад лагь­ай секретарвиле кIвалахна. Вири и йисара ада ислягь девирда хуьруьн майишат вилик тухунин, хуьрера социальный месэлаяр гьялунин карда еке кIвалах тухвана. И карда къазанмишай агалкьунрай ам 1951-йисуз «Зегьметдин Яру пайдах» ордендиз лайихлу хьана. КIвалах авунихъ галаз сад хьиз ада вичин чирвилерни хкажиз хьана. Кьилди къачуртIа, ада 1951-1954-йисара Москвада высший партийный школа куьтягьна.

1954-1961-йисара Шихбала Гьажиба-баевакай мад Кьасумхуьруьн партия­дин райкомдин сад лагьай секретарь хьана. И йисара районда аквадай хьтин дегишвилер хьана. Район социальный, экономикадин рекьерай хейлин вилик фена. Кьилди къачуртIа, хуьрера школаяр, клубар, медпунктар, туьквенар, библиотекаяр ва маса идараяр эцигна, хуьрериз рекьер тухвана, яд авачир ва маса четинвилер авай хуьрер дуьзенриз куьчарна, магьсулар цазвай никIерин, багъларин майданар гегьеншарна.

1961-йисалай 1977-йисалди Ш. Гь. Гьажибабаева Каспийск шегьерда «Дагдизель» заводда директордин заместителвиле кIвалахна. 1976-йисуз ам лайихлу пенсиядиз экъечIна. Персональный пенсионер Гьажибабаеваз кIвалах тавуна кьарай атанач. Ада заводдин социальный ахтармишунар тухудай отделдин начальниквиле кIвалах авун давамарна.

Дяведа хьайи хирери чпикай мукьвал-мукьвал хабар гуз хьана. I984-йисан 6 ноябрдиз хъсан инсан, регьбер тир ам кечмиш хьана.

Хуьруьн депутатрин Собранидин, администрациядин къарардалди Ш. Гь. Гьажибабаеван тIвар хуьруьн са куьчедиз ганва. Хуьруьн Рагьимован тIварунихъ галай юкьван школада хайи ерияр чирдай кружокдин членри адакай гзаф материалар кIватIнава. Адан женгинин ва зегьметдин рекьиз бахшнавай шикилрин стенд ва хъсандиз безетмишнавай альбом акъуднава.

Адан баркаллу женгинин, зегьмет­дин рехъ жегьил несилриз чешне я.

Дугъриданни Ш. Гь. Гьажибабаева женгера, зегьметда къазанмишай агалкьунралди, вичин девирда авур хъсан краралди, халкьдин арада гьуьрмет къазанмишуналди вичин гел тарихда эбеди яз туна.

Чи корр.