Шаирдин гуьгьуьл къачуна

СтIал Мислимат (Агьмед-пашаева). И тIвар ван тахьай, ам чин тийидай кас Лезгистанда бажагьат ава. И кардихъни вичин тайин себеб ава.

Мислимат хала фадлай инихъ вичин тIвар инсанрин арада машгьур хьанвай, уьмуьрдин уькIуь-цуру акунвай ва абур халкьдал шиирралди агакьарзавай бажарагъ авай шаир я.

Мислимат халадин са шумуд ктаб чапдай акъатнава, лезги шииратдал рикI алайбуру абур еке ашкъи аваз кIелзава, адаз еке къимет гузва. Ам санлай кьурла шаиррин хизандин дидени я. Вичин веледрилай (Агьмедпаша, Саират) алатайла адан хтулри, птулрини и яратмишунрин кар давамарзава.

ТIебиатдин, яшайишдин къанун я: инсан, шак алачиз, яшлу жеда. Мислимат халани са кьадар яшлу хьанва, яшлувилиз килигай кефсузвални ава. ЯтIани зайифвал ада ийизвач, руьгьдай аватзавач, кьатIунрай, рикIел аламукьунай са бязи жегьилрилай агъа патал алач.

Ам фадлай халкьдин арада аквазвачир. Суракьна, шаирдин патав гуьгьуьл къачуз, лугьудайвал, кьил чIугваз, ДР-дин писателрин Союздин райондин отделенидин теклифдалди адан патав фена зун.

ЭрчIи гъиле куьмекчи асани кьуна, хъуьрез-хъуьрез, чи къаншардиз атай ада чун шаддиз къаршиламишна, кефсуззавай жувазни шад хьана Мислимат халадин тавазвилер кьабулайла.

Ахпа хваш-беш, жузун-кучузунар, кхьинрикай ихтилатар хьана. Вич рикIел атана, гуьгьуьл къачуз атунай кьадар авачир кьван шад хьана шаирдиз. Чи тIалабуналди эхиримжи вахтара кхьенвай са шиирни кIелна ада.

«Фикир ая, инсан, жуван эхир кьиликай» шиирдай кьве-кьве цIар гъиз кIанзава:

Ракъининни йифен гьуьжет хьанва датIана,

Къвезва мад йиф, югъ тваз кIеве, ишигъ атIана.

Гьамишанда вун яз жедач къуллугъдин иес…

Ви четин (ю)къуз акваз тахьуй ваз стха, мирес…

Яшлу инсан бизарнач, ихтилатар куьруь авуна, кьве келима къейднавай вичин 95 йисакайни кватна. Ам яшлу шаирдиз – Мислимат халадиз – РФ-дин Президент В. Путина вичин чарчелди тебрикнавай.

Чи Мислимат халадин чан сагърай, ам чи арада яргъалди яшамиш хьурай!

Райсудин Набиев, муаллим, зегьметдин ветеран.