«Россиядин къизилдин хизан» ва я «Алмаздин мехъер»

Чпин хайи йикъар-юбилеяр къейд авур ва ийидай машгьур ксар-алимар, шаирар, писателар… районда мадни ава.

РикIерни сирер, вафалувални муьгьуьббат сад авуна, арада гьуьрмет-хатур аваз, 60 йисуз санал яшамиш хьун – бес им шад вакъиа, юбилей тушни?! Юбилей я, вични гьихьтин! Итимни паб 60 йисуз санал яшамиш хьана къейд ийизвай мярекатдиз «Алмаздин мехъер» лугьун дуьшуьшдин кар туш. Кьулан СтIалрин хуьряй тир АбдулнатIиф НатIифович ва Саимат Пашаевна Пирисмаиловри и йикъара (августдин вацра) «Алмаздин мехъер» къейд ийизва.

Пирисмаиловрин хизандихъ цIинин йисуз шадвалдай мад са себеб ава: «Хизандин йис» лишандик кваз тухвай конкурсда «Россиядин къизилдин хизан» номинацияда ам гъалиб хьана.

Чи къенин суьгьбетни Абдул-натIиф ва Саимат Пирисмаиловрин хизандикай я.

… Бахт. Яраб ам квекай ибарат ятIа? Асирра инсанар и суалдиз жаваб жагъуриз алахъзава. ЯтIани, къени са жавабдал атанвач. Садбуруз мал-девлет хьун бахтлувал яз аквада. Кьвед лагьайбуруз еке къуллугъдал хьун бахтлувал яз аквазва. Бахтлувал маса уьлчмейрай аквазвай, гьисабзавай инсанарни ава. Гьардаз вич гьахъ язни аквазва.

Пирисмаиловрикай макъала кхьиз эгечIайла, гьа и «Бахтлувал квекай ибарат я?» суал за АбдулнатIиф НатIифовичаз ва Саимат Пашаевнадиз гана.

- Дуьз лагьайтIа, за и суал гуьзлемишни авунвачир, — шаклувал акатай тегьерда лагьана А. Пирисмаилова. – Зи фикир-далди, мягькем сагъламвал, туькIвей хизан хьун, жуван рикI алай пешедай кIвалах авун, хуьре-кIвале гьуьрмет къазанмишун – им бахтлувал я. Эгер жувакай ва жуван хизандикай рахаз хьайитIа, завай рикIел гъил эцигна лугьуз жеда: чун бахтлу я! Пудкъад йисуз жуван уьмуьрдин юлдашдихъ галаз санал гьуьрметлудаказ яшамиш хьун, хайи хуьруьз, райондиз, республикадиз са вуч ятIани ийиз алакьун, вад аялдиз уьмуьр гун, къе 14 хтулдин ва 11 птулдин чIехи дидени-буба хьун – мегер им бахтлувал тушни?!

Саимат Пашаевнади вичин уьмуьрдин юлдашдин гафарин гьахълувал тестикьар хъувуна.

- Чаз чи уьмуьрдилай наразивал, шикаят авун гунагь я, — лагьана С. Пирисмаиловади. – Заз акI я хьи, чун санал яшамиш жезвай пудкъад йис са легьзе хьиз акъатна, на лугьуди, чун накь эвленмиш хьайибур я. Къе за зун бахтлу дишегьли яз гьисабзава. И йисара чна сада масадан, я чна веледрин, я веледри чи кефи хайиди туш. Чи хизанда итим кIвалин, хизандин кьил я, дишегьли – кIвалин къул хуьзвайди. Веледарни чи гъвечIид-чIехид чидайбур, михьи рикI, ширин мез авайбур яз чIехи хьана. Им, гьелбетда, ахлакьдин, тербиядин «бегьер» я.

Пирисмаиловрин хизан, иллаки АбдулнатIиф НатIифович, районда ва адалай яргъарани гзафбуруз хъсандиз чида, таниш я. Ада чаз лагьайвал, хуьруьн юкьван школа акьалтIарай жегьил гада хуьруьн майишатдин институтдик экечIна. Кьве йисуз ана кIелайдалай гуьгъуьниз, начагъвал себеб яз, АбдулнатIиф кIвализ хтуниз мажбур хьана. Ада вичин зегьметдин рехъ райондин про-куратурада жергедин секретарвиле кIвалах авунилай башламишна. Гуьгъуьнилай армиядин жергейра къуллугъна.

- Бубайрин мисалда лугьуз-вайвал, кьисметдихъай катиз жедач, — давамарзава ихтилат АбдулнатIиф НатIифовича. – Кьисмет я жеди, зани яргъал йисара къайдаяр хуьдай органра кIвалахна, Ростовдин юридический институтни акьал-тIарна.

Хъсан зигьин, кьатIунар, дерин чирвилер авай жегьил пешекар къуллугъдин «гурарайни» йигиндаказ хкаж хьана. Дагъустан Республикадин къенепатан крарин министерстводин руководстводи А. Пирисмаилован кIвалахдиз, чалишмишвилериз лайихлу къимет гана. Адан леке квачир, михьи къуллугъди, тапшурмишай кар кьилиз акъудуни, коллективда вич тухунин тегьерди ам къуллугърал тайинарунин карда еке роль къугъвана.

АбдулнатIиф НатIифовича лугьузвайвал, ам вичин кIвалах анжах пешекарвилелди, законри истемишзавайвал, кьилиз акъудиз алахъна. Гьа кар себеб яз, ам Дагъустан Республикадин къе-непатан крарин министерстводин аппаратдизни кIвалахал хутахна.

Са йисалай Дагъустандин обкомдин бюродин къарардалди А. Пирисмаилов Кеферпатан Кав-каздин къенепатан крарин управленидин транспортный милициядин линейный управле-нидин начальниквилин кIвалахал хутахна. Къуллугъдин рекьяй хкаж хьунихъ галаз санал, адан жавабдарвал, хиве авай везифаярни артух жезвай. Абурни кьегьал лезги хци уьзуьагъдаказ, намуслудаказ кьилиз акъудна. Подполковникдин чинда аваз отставкадиз экъечIай А. Пирисмаилова са шумуд йисуз шегьердин администрацияда кIвалах хъувуна. Сагъламвилин гьалдиз килигна кIвалахдивай къерех хьайи ам, хтана, хайи хуьре вичин хизанни галаз яшамиш жезва.

- Жуван уьмуьрда за рес-публикадин гзаф шегьерра ва районра кIвалахна, командиров-кайра хьана, — давамарзава ихтилат А. Пирисмаилова. – Виридалайни заз зи хайиди тир Кьулан СтIалрин хуьр, СтIал Сулейманан тIварунихъ галай район, анрин агьалияр кIан я. Гуьрчегвилин жигьетдай зи гъвечIи ватандив къведай маса чка заз чидач. Хуьруьн кимел экъечIун, агьалийрихъ галаз ихтилат-затI авун, жуван кIвалерихъ галай усадьбада авай ципицIрин тегьенгрихъ, ичин, хутун, шефтелин, анардин, машмашин къелемрихъ гелкъуьн, ана хтулрихъ галаз сейр авун – ибур зи къенин къайгъуяр, машгъулатар я. Ида заз кIубанвални гузва.

АбдулнатIиф НатIифовича хиве кьазва: ам вичин фейи уьмуьрдал, авур къуллугърал, хизандал рази хьуник Саимат Пашаевнадин еке пайни ква. Гьиниз къуллугъдин рекьяй ам акъуднатIани, шад ва четин легьзейрани, мегьрибан дишегьли тир кайвани гьамиша адан патав хьана.

- Хуьре, районда ва адалай къеце тухузвай мярекатра иштиракдайла АбдулнатIиф НатIифовича вичин параддин форма алукIда, — ихтилатзава Саимат Пашаевнади. – Пенжекдин хурудал алкIурнавай гзаф кьадар орденарни медалар акурла, за фикирни ийида: наградайрикай гьарма сад зи итимдин тамам са девир я. Абурулай вил аладариз, зак дамахдин гьиссни акатда.

Хайи халкьдин, хизандин адетар давамарзавай рухваярни рушар хайи, тербияламишай, чIехи авур дидедин зегьметдиз гудай къимет авани кьван? Саимат Пашаевнадал уьмуьрдин юлдашди, веледри, хтулрини птулри ийизвай разивални шадвал – им С. Пирисмаловадиз ганвай, авай чIехи къимет я.

… Дагъустандин халкьдин шаир Майрудин Бабаханова вичин са шиирда кхьизва: «…За анжах са кар тIалабда: Яшамиш хьун тIал-квал квачиз яргъалди».

«Алмаздин мехъер» мубарак авуналди, чазни АбдулнатIиф ва Саимат Пирисмаиловрихъ тIал-квал квачир сагълам уьмуьр, хизандин бахтлувал, веледрикай, хтулрикайни птулрикай рикIин динжвал хьана кIанзава.

Хазран Кьасумов, РФ-дин журналистрин Союздин член.

Шикилда: Пирисмаиловрин хизан.