Меню
16+

Сетевое издание «Кюре»

10.09.2019 14:43 Вторник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

О народном ансамбле барабанщиков "Касумкент"

Далдамчийрин «Кьасумхуьр» халкьдин ансамбль

Сулейман-Стальский район рес-публикада, адалай яргъарани машгьур авур инсанар хьиз, кьилдин коллективарни ава. Абурун арада «Кьасумхуьр» тIвар алай далдамчийрин ансамблди кьетIен чка кьазва. 

Са вахтара ансамбль къудратлу ва зурба Советрин Союзда машгьур хьанай.

«Кьасумхуьр» далдамчийрин ансамбль 1958-йисуз райондин культурадин отделдин заведующий, РСФСР-дин культурадин лайихлу работник Ифрат Кьасумова тешкилнай. 1960-йисуз уьлкведин меркез Москва шегьерда кьиле фейи Дагъус-тандин культурадинни искусстводин йикъара (Декадада) иштирак авунай ва алакьунрай далдамчийрин ансамблдиз «Халкьдинди» лагьай гьуьрметдин тIвар ганай.

Сифте тешкилайла ансамблдик пуд кас квай – Ифрат Кьасумов, Абдулбари Гьажимегьамедов ва Гьажибала Гьажимисриев. Ифрат Кьасумова и дестедиз регьбервални гузвай.

- Къвез-къвез чи ансамблдин гьевес-каррин кьадарни артух жез эгечIна, — рикIел хкизва алай вахтунда Эминхуьре яшамиш жезвай Гьажибала Гьажимисриева. – ИкI, ансамбль яваш-яваш 7, са арадилай 9 ва гуьгъуьнилайни 11 касдикай ибарат хьана. Иштиракчиярни са шумудра дегиш хьана.

Гь. Гьажимисриева ансамблдикай ихтилат ийидайла, за ихьтин са кардизни фикир гана: гьар сеферда ансамблдин иштиракчийрин кьадар тек жезва. Им дуьшуьшдин кар ятIа, я тахьайтIа адахъ са гьихьтин ятIани сир аватIа?

- Ваъ, дуст кас, ансамблдин иштиракчийрин кьадар тек хьун дуьшуьшдин кар туш, — давамарзава ихтилат Гьажибала Гьажимисриева. – Далдамчияр жергеда аваз стулрал ацукьзава, абурун юкьва авай кас «хорда кьил кутазвайди» я, адав далдам, амайбурув кIараралди язавай тафтар жезва. Им ансамбль тешкилай сифте йикъалай адет хьанвай, къенин юкъузни давамзавай кар я.

1966-йисуз далдамчийрин «Кьасум-хуьр» ансамблди «Дагъустандин искусствойринни культурадин гьафте-Лениградда» лишандик кваз кьиле фейи мярекатда, гуьгъуьнлай Дондал алай Ростовда, Бакуда, ТIифлисда, Сочида, Юкьван Азиядин республикайра, Болгарияда, Чехословакияда ва масанра тухвай фестивалра, конкурсра, куль-турадинни искусстводин мярекатра иштиракна, чпин кьетIен бажарагъ ва устадвал къалурна.

Яргъал йисара ансамблдин кIвалахда иштирак авур Гьажибала Гьажимисриева чаз лагьайвал, тIвар-ван авай ансамблди халкьдин авазрал бинеламиш хьана кIвалахна, гьевескарри Дагъустандин вири халкьарин авазар тамамарзавай. Ансамблди вичин нумраяр мукьуфдивди гьазурзавай, абур цIийи хъийизвай. Гуьгъуьнлай ансамблди Азербайжандин, Гуржистандин, Эрменистандин, Уз-бекистандин халкьарин авазарни чпин репертуардик кутуна.

«Кьасумхуьр» ансамблди Мурад Кажлаеван «Ритмы и годы» телефильмда иштиракна, «Под небом Шалбуздага» кинофильмда макьамар тамамарна, СССР-дин центральный телевиденидин сад лагьай каналдай «Шире круг» передачада иштиракна.

Яргъал йисара ансамблда машгьур далдамчияр тир Къайиб Къайибова, Шарафудин Мейланова, Зубаил Къурбанова, Омар Селимова, чна винидихъ тIвар кьур Гьажибала Гьажимисриева ва масабуру активвилелди кIвалахна.

1981-йисуз ДАССР-дин Верховный Советдин Президиумдин Указдалди далдамчийрин ансамблдиз ва адан иштиракчияр тир Абдулаким ва Абдулбари Гьажимегьамедовриз Гьуьрметдин грамотаяр гана.

Ансамбль 18 сеферда Вирироссиядин килигунра гъалиб хьана, ада 1-дережадин дипломар къачуна. Ам ДАССР-дин ва РСФСР-дин культурадин министер-ствойрин патай Гьуьрметдин грамотайриз лайихлу хьана.

Йисар хьана далдамчийрин ансамблди вичин кIвалах акъвазарай. 2010-йисуз районда машгьур далдамчи Агъарагьим Агъарагьимов кьиле аваз далдамчийрин «Кьасумхуьр» ансамбль тешкил хъувунва, ада районда, республикада ва адалай къеце тухузвай мярекатра иштиракзава, халкьдин коллективдин машгьурвал арадал хкизва. ЦIийиз тешкил хъувунвай, 9 касдикай ибарат тир ансамблди чпин гьунарар Яран суварик, СтIал Сулейманан поэзиядин йикъарик, халкьдин яратмишунрин «Лезгистандин авазар» фестивалда, Махачкъалада, Каспийскда ва масанра тухвай мярекатра, «Музыкадин майдан» лишандик кваз тухвай республикадин телеконкурсда, Кеферпатан Кавказдин халкьарин яратмишунрин «Терек-дуствилин вацI» фестивалда ва масанра къалурна.

2019-йисан февралдин вацра Махачкъала шегьерда «Халкьдин коллектив» тIвар тестикьарун патал кьиле тухвай халкьдин яратмишунрин коллективрин килигунра далдамчийрин «Кьасумхуьр» ансамблди нубатдин сеферда «Халкьдин коллектив» тIвар тестикь хъувуна. Им далдамчияр тир Агъарагьим Агъарагьимован, Сул-тIанагьмед Хидирован, Умудбег Малагиеван, Ислеман Ризаеван, Шихсаид Шихнабиеван, Усенбег Гьажимурадован, Тарзан Саругъланован, Керим Камилован устадвилин нетижа я.

Хазран Кьасумов

Шикилда: 1970-йисарин далдам-чийрин ансамблдин коллектив.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

55