Меню
16+

Сетевое издание «Кюре»

10.09.2019 14:55 Вторник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Первая конференция лезгинских поэтов и писателей в Касумкенте

Лезги шаиррин 1-конференция – Кьасумхуьрел

Тарихдин делилри шагьидвал ийизвайвал, алай йисуз вич тешкилайдалай инихъ 90 йис тамам жезвай чи районда гьеле ам арадал атай 1929-йисан августдин вацра лезги шаиррин 1-конференция кьиле фенай. Адан тешкилатчи чи халкьдин руьгьдин мягькем даяхрикай сад тир алим, педагог, фольклорист, писатель, публицист, государстводин ва общественный деятель Гьажибег Агьмедханович Гьажибегов тир.

И кардихъ вичин себебарни авачиз тушир. ГьикI хьи, чIехи арифдаринни шаиррин макан яз гьисабзавай Куьре магьалди хайи халкьдиз Куьре Мелик, Рухун Али, Етим Эмин хьтин чIехи бажарагъар багъишнавай. Кесиб синифрин арадай акъатнавай СтIал Сулейманани вичикай бажарагъ авай шаирдикай хьиз хабар ганвай.

И конференцияда делегатар яз неинки, са чи райондин, гьакI къунши районрин шаиррини иштиракнай. Анал кьетIен бажарагъ авай ва вич савадсуз шаир тир СтIал Сулейманахъ галаз хьайи сифтегьан гуьруьшмишвал аданни Гьажибег Гьажибегован еке дуствилиз элкъвенай ва абур уьмуьрдин эхиримжи декьикьайралди сад-садаз вафалуни яз амукьнай.

Гьажибег Гьажибегова лезги чIал, эдебият ва меденият вилик тухунин, чи халкьдин гележегдин гьакъиндай чIугвазвай зегьметдиз, адан чалишмишвилериз гузвай еке къимет шаирдин шииррин цIарарайни аквазва:

Эвела ваз салам-дуьа,

Зи рикIин ишигъ Гьажибег.

Къенин къалди зунни я сагъ,

Кефияр – ачух, Гьажибег.

Гьайиф жез чун чавай яргъа,

Вучзава зи гъвечIи ваха?

Минет хьуй, чан руш Зулейха,

Вуна хъсан хуьх Гьажибег…

Эхь, арифдар шаирди Гьажибег Гьажибегов вичин рикIин ишигъдив гекъигуналди, адан ниятрин къенивал, вичин патай адаз авай гьуьрмет къалурзава, ахьтин инсанар хуьнин меслят гузва. Мадни а кар къейд ийиз кIанзава хьи, Гь. Гьажибегован уьмуьрдин юлдаш Зулейха Султанова чи райондай, Кьасумхуьрелай тир.

Алатай асирдин 1937-йисарин къансузвилерин къурбандар хьайи Гьажибег Гьажибегов, Нажмудин Самурский, Алискендер Алкадарский хьтин чи халкьдин гележегдихъ кIевелай рикI кузвай кьегьал рухвайрин бахтсуз хьайи кьисметри чIехи шаирдин уьмуьрни куьруь авуна…

Абидин Камилов, шаир, ЛПС-дин райондин отделенидин председатель.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

30