1999-2019: Бандитрин дестеяр чукурайдалай инихъ 20 йис Садвал къалурна, Дагъустан хвена

ИкI, 3-августдиз 100 касдикай ибарат тир бандитрин кIеретIди Кучали хуьруьн патав гвай къенепатан кьушунрин заставадал, 4-августдиз бандитри (100 кас) Агвали хуьрел гьужумна, 8-августдиз бандитри Ботлих райондин Шодрода ва Зибирхали хуьрер кьуна, 9-августдиз Ботлихда авай аэродромдиз гуьлле гана… 10-августдиз Россиядин бязи СМИ-ри хабар гайивал, Дагъустандин исламдин Шурадиз «Дагъустандин аслу тушир государство» малумариз кIанзавай.

Бассаеванни Хаттабан гъилибанрин ниятар лап чIурубур, Россиядин ва Дагъустандин законриз аксибур тир.

Гьукуматдин органри Дагъустандин халкьар фад гъавурда туна ва Дагъларин уьлкведин азадвал, абадвал, Россиядин халкьарихъ галаз садвал хвена кIанзавай вири ватанпересар бандитриз акси яз къарагъна, лекьерин макандал яракь гъилеваз, чIуру къастар аваз атай душмандин хура акъвазна.

Республика патал лап четин чIавуз (1999-йисан 27-августдиз) Дагъустандиз вич анжах тайинарнавай жегьил премьер, гила РФ-дин Президент Владимир Путин атанай. И кардикди гьам чи Яракьлу Къуватрин, гьам къанун-къайда хуьдай органрин, гьам халкьдин ополченидин векилриз чир хьанай хьи, чахъ мягькем далу – чи государстводин руководство гала. Владимир Путина Ботлихда халкьдин вилик лагьай гафар тарихда гьатнава. Гъалибвилин сагълугъдай бокал хкажун теклифайла, Президентди лагьанай: «Чна бокалар хъвада, гьар гьикI хьайитIани хъвада, дустар. Анжах а кар чна Дагъустан тамамвилелди азад авурдалай кьулухъ ийида…»

Халкьдинни кьушунрин садвал себеб яз, Дагъустандин азадвални хвена, бандитар тергна. Дагъустан ва дагъустанвияр чIехи Россиядин сад тир хизандивай къакъудиз тежерди дуьньядиз чир хьана. ЧIехи шаир Расул Гьамзатова гьа чIавуз лагьанай: «Урусатдик чун хушуналди экечIна, гужуналди къакъудиз жедач!»

Республика бандитривай хуьни гьар са касдик дамах, шад гьиссер кутазва. Гьа са вахтунда рикIе хажалатни ава. Чал илитIай дяведа хейлин инсанар телеф хьана эхир. Россиядин Яракьлу Къуватрин, МВД-дин къенепатан частарин аскерар ва офицерар, милиционерар, ополченидин векилар. Абурун тIварар дагъустанвийрин рикIера ватанпересвилин, интернационализмдин, къагьриманвилин лишан яз амукьда.

Алай вахтунда Дагъустан Республикада Ботлих, ЦIумада ва Новолак районриз сухулмиш хьайи террористрин международный кIеретIар кукIварайдалай инихъ 20 йис тамам хьуниз талукьарна Махачкъалада, Ботлихда, ЦIумадада ва масанра гьар жуьредин серенжемар тухузва, анра ДР-дин Кьил Владимир Васильева, ДР-дин Гьукуматдин Председатель Артем Здунова ва жавабдар маса юлдашри иштиракзава. ДР-дин Кьили лагьайвал, гьа вакъиайрин нетижа яз къе чун виликандалай са шумуд къат къуватлу, адалатлу ва тупламиш хьанва.

Х. Кьасумов