Сувабдин крар рикI михьи инсанри ийида
Районда кардик квай агьалийриз социальный рекьяй къуллугъзавай комплексный Центр (КЦСОН) ва тежрибалу ашпаз Зирифа Абдулгьалимовади кIвалахзавай столовая Кьасумхуьрел сад-садан патав гва. И центрадиз тIимил таъмин хизанрай тир, чпихъ гелкъуьн кIанзавай аялар гъизва, абурухъ галаз логопедди, патронажный медсестради, массажистди, юристди ва маса пешекарри кIвалах тухузва, гьакIни аялриз тIуьн гун тешкилнава.
И кIвалахра Центрадин пешекарриз рикI михьи, гъил ачух инсанрини чпелай алакьдай куьмекар гузва. ИкI, и йикъара ашпаз Зирифа Абдулгьалимовади Центрадиз хуьрерай тIимил таъмин тир 10 хизандай гъанвай аялриз вичин патай пулсуздаказ тIуьнар ва ширинлухар авай пакетар гана.
- Чи КЦСОН-диз гъизвай аялриз Зирифа Гьажикеримовнади вичин патай тIуьнар, пишкешар гуз им сад лагьай сефер туш, — лугьузва КЦСОН-дин яш тамам тахьанвайбурун реабилитациядин отделенидин заведующий Заира Азизовади. – Ихьтин мергьеметлу ва баркаллу кIвалахдай чна ва аялрин диде-бубайри адаз чухсагъул лугьузва.
Гьакъикъатдани, вичин пешедал рикI алай, кIвалахдин гзаф йисарин тежриба авай ашпаз хьиз, З. Абдулгьалимова рикI михьи, гъил ачух инсанни я. Чун шагьид хьайивал, Кьасумхуьрел Ленинан куьчедин къерехдай тротуар тухузвай устIарризни З. Абдулгьалимовади вичин патай кьве юкъуз пулсуздаказ тIуьнар ганай.
Зирифа Гьажикеримовна хьтин мергьеметлу, гьа са вахтунда сувабдин крар ийизвай инсанриз аферин ва баркалла!
Х. Кьасумов
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
