Меню
6+

Сетевое издание «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Лезги чIалан Югъ къейдна

10-октябрь. Пакамахъай И. Гь. Тагьирован тIварунихъ галай райондин Культурадин дворец галайвал кIеретI-кIеретI хьана суварин либасар алай лезги чIалан муаллимар, кIелзавай аялар, атанвай мугьманар чинра шад хъвер аваз физвай.

Малум тирвал, чи районда гьар йисуз 10-октябрь лезги чIалан Югъ яз къейд авунин жигьетдай къарар кьабулнава. Алай йисуз ам 2-сеферда яз агьалийрин гегьенш къатарин иштираквал аваз шад гьалара къейдна.

10-октябрь. Пакамахъай И. Гь. Тагьирован тIварунихъ галай райондин Культурадин дворец галайвал кIеретI-кIеретI хьана суварин либасар алай лезги чIалан муаллимар, кIелзавай аялар, атанвай мугьманар чинра шад хъвер аваз физвай.

Анин банкетрин залда сувариз гьазурвал акунин эхиримжи кIвалахар кьиле тухузвай. Аниз атайбурун фикир Алкьвадар Гьасан-эфендидин тIварунихъ галай райондин центральный библиотекадин работникри акъуднавай ктабрин выставкади, чи райондин уьмуьрдиз талукьарнавай «Художественное фото», «Стоп-кадр», «Наши будни», гьакIни кьилди СтIал Сулейманаз талукьарнавай шикилрин стендри, райондин художественный школадин муаллимри ва аялри кIарасдин тахтайрал кунин къайдада янавай чи райондин машгьур шаиррин ва писателрин, юкьва «Мой Дагестан» кхьена, чи Дагъустандин классикрин суьретрин, райондин аялрин яратмишунрин КIвалин тербиячийри гьазурнавай шейэрин выставкайри чпелди желбзавай.

Сегьнедин кьиле аквадай чкадал СтIал Сулейманан «Жуван халкьдиз, жуван намусдиз хьиз, вафалу жен» гафар кхьенвай.

Лезги чIалалди тотальный диктант кхьинин асул майдан и залда ачухнавай. И карда кьиле райондин Кьил Нариман Абдулмуталибов аваз 20 касдилай виниз райадминистрациядин къуллугъчийри, муаллимри, райондин яратмишдай интеллигенциядин векилри ва атанвай мугьманри иштиракна.

Диктант кхьидалди вилик анал рахай райондин Кьил Нариман Абдулмуталибова залда авайбуруз, вири районэгьлийриз лезги чIалан Югъ мубарак авуна, лезги чIала чи халкьдин милли ивирар кIватI хьанвайди къейдна, абур хуьниз ва вилик тухуниз эвер гана.

Гуьгъуьнлай анал дидедин чIалакай ам хуьнин важиблувиликай чпин фикирар ва шиирар гваз шаирар тир Сажидин Саидгьасанов, ЦIийи Фиригърин юкьван школадин лезги чIалан муаллим Абдулагъа Ашурагъаев, «Вахтар ва инсанар» республикадин передачадин кьилин редактор Владик Батманов рахана.

Лезги чIалан Югъ къейд авунин сергьятра аваз гуьгъуьнлай анал яратмишунрин карда, кIвалахда ва кIелунра хъсан нетижаяр къазанмишнавай яратмишдай интеллигенциядин векилар, райондин муаллимар ва кIелзавай аялар ашкъиламишунин мярекат кьиле фена. Анал райадминистрациядин патай Сардархуьруьн «Аманат» ясли-бахчадиз райондин Гьуьрметдин грамота гана. Цмуррин СОШ-дин коллективдиз ва райондин культурадин отделдин начальникдин заместитель Жабир Султановаз чухсагъулар малумарна. Лезги чIалан ва литературадин муаллим Зурият Султанагьмедовадиз райондин Кьилин тIвар алай сят гана. Анал гьакIни Имам Яралиеван «Умуд» мергьеметлувилин фондунай «Зи хайи чIал» сочиненидин конкурсдин нетижайрай гъалибчидиз ва призерриз – 7-классрин аялрин арадай Вагьид Къачаеваз (Курхуьруьн СОШ), Самира Фатаховадиз (Кьулан СтIалрин СОШ), Саида Гьашимовадиз (Эминхуьруьн СОШ), «Зи лезги чIал» шиирар кIелдайбурун конкурсдин нетижайрай 8-классрин аялрикай Тажлар Жарулаевадиз (ЦIийи поселокдин СОШ), Милана Абдулмежидовадиз (КIварчагърин СОШ), Амирхан Шагьпазоваз (Кьулан СтIалрин СОШ) ва Ислам Сефербеговаз (ЦIийи Макьарин СОШ), «Зи хайи Ватан» шикилрин конкурсдин нетижайрай 4-6-классрин аялрин арадай Равил Жаватоваз (Курхуьруьн 1-нумрадин СОШ), Намида Исламовадиз (Вини СтIалрин СОШ) ва Жемила Идрисовадиз (Алкьвадрин СОШ) пулдин пишкешар гана.

Хайи лезги чIал чирунин ва хуьнин жигьетдай Вини СтIалрин СОШ хъсанди яз гьисабна ва пулунин премия гуналди къейдна.

Лезги чIалан ва литературадин муаллим Гуьзел Межидова хайи чIалалди махарин «Живая сказка» Международный конкурсдин гъалибчи гьазурунай пулдин премия гуналди ашкъиламишна.

Лезги чIал хуьнин кардик еке пай кутунай пулунин премийралди гьакIни чIалан ва литературадин муаллимар тир Аксиня Джавадова (ЦIийи поселокдин СОШ) ва Мадина Ферзалиева (Агъа СтIалрин СОШ), Кьасумхуьруьн 2-нумрадин ясли-бахчадин тербиячи Тамила Гьажимурадова, «Кюре» аялрин манияр лугьудайбурун ансамблдин руководитель Нариман Османова къейдна.

«Умуд» мергьеметлувилин фондунин патай «Лезгияр» ктаб гьазурунай ва чапдай акъудунай Гьажи Ильясоваз ва «Куьредин ярар» культурадин центрадин регьбер Агьмедпаша Агьмедпашаеваз грамотаяр ва пулунин премияр гана.

Премияр шад гьалара вахкунихъ галаз санал райондин Кьил Нариман Абдулмуталибова вири лауреатриз ва призерриз къазанмишнавай агалкьунар мубарак авуна. Ада лезги чIал хуьнин ва вилик тухунин жигьетдай

тешкилзавай мярекатрин иштиракчияр материальный ва руьгьдин жигьетдай ашкъиламишунин карда куьмекар гунай «Умуд» фондуниз, кьилди Имам Музамудинович Яралиеваз чухсагъул лагьана.

Эхирдай суварин иштиракчийриз концертдин программа къалурна.

Абидин Камилов, шаир, ДР-дин культурадин лайихлу работни

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3